Völsungssigur á Fellavelli

Arnþór skoraði sigurmarkið.

Völsungar héldu sigurgöngu sinni í Lengjubikarnum í gær þegar þeir sóttu Hattarmenn heim en leikið var á Fellavelli í nístingskulda. Ekki mátti þó miklu muna að leikurinn endaði á jafntefli því þegar komið var fram yfir venjulegan leiktíma var staðan markalaust jafntefli. En Arnþór Hermannsson sá til þess að Völsungarnir færu með stigin þrjú norður er hann skoraði á 94 mínútu leiksins eftir góðan undirbúning Stefán Björns Aðalsteinssonar.

Eftirfarandi umfjöllun um leikinn er fengin af heimasíðurnni www.123.is/volsungur

Það var mikill kuldi á Egilsstöðum er Völsungur heimsótti Hött í þriðju umferð Lengjubikarsins í kvöld. Leikurinn fór fram undir berum himni á Fellavelli í nístingskulda eins og áður kom fram. Leikmenn voru lengi að finna taktinn og var leikurinn ekki mikið fyrir augað. Hrannar Björn lét til sín taka í sókninni hjá okkar mönnum og var ófeimin við að láta vaða á markið en til gamans má geta að í marki Hattarliðsins stóð enginn annar en Sveinbjörn Grímsson sem spilaði með Völsungsliðinu í fyrra sumar. Steinþór þurfti einu sinni að láta til sín taka í fyrri hálfleik og varði með tilþrifum en lítið var annars um hættu fyrir framan mark Völsungs. Undir lok fyrri hálfleiks komst Hrannar í gegn eftir sendingu frá Bjarka og var felldur innan vítateigs en ekkert var dæmt. Vafasöm ákvörðun dómarans en það sást greinilega að Hrannar var sparkaður niður. Fyrri hálfleik lauk svo í kjölfarið og markalaust í frostinu fyrir austan er blásið var til leikhlés.

Síðari hálfleikur fór rólega af stað og lítið gerðist þar til á 65 mínútu en þá barst boltinn inn fyrir vörn Hattar eftir klaufagang í vörn heimamanna, þar var Hrannar Björn réttur maður á réttum stað en Sveinbjörn Grímsson varði vel í markinu. Völsungur sótti mikið undir lok leiksins og markið lá í loftinu. Þegar að komið var á 94 mínútu leiksins kom loks markið góða. Þar var að verki Arnþór Hermannsson en hann skoraði af stuttu færi eftir góðan undirbúning Stefáns sem hafði komið inn á fimm mínútum áður. Gríðarlega sætur sigur og liðið enn með fullt hús stiga eftir þrjár umferðir.

Á heimasíðunni www.123.is/volsungur er einnig að finna viðtal við Sveinbjörn Má Steingrímsson sem kom inn á í gærkveldi. Þetta var hans fyrsti leikur frá því síðasta sumar en hann hefur átt við meiðsli að stríða. Viðtalið má lesa hér