Umfjöllun: Frábær sigur á Fjölni

Stelpurnar fagna marki fyrr í sumar

Kvennalið Völsungs mætti í borg bleytunnar til þess að spila gegn Fjölnisstúlkum í gær, sunnudag. Borgin tók á móti stúlkunum með ausandi rigningu og voru vallaraðstæður skemmtilegar til knattspyrnuiðkunar. Ekki mátti sjá marga Fjölnisaðdáendur í stúkunni en hún var gjörsamlega einokuð af Húsvíkingum.

Byrjunarlið Völsungs: Anna Guðrún Sveinsdóttir, Elma Rún Þráinsdóttir, Jóney Ósk Sigurjónsdóttir, Ásrún Ósk Einarsdóttir, Anna Halldóra Ágústsdóttir, Dagbjört Ingvarsdóttir, Berglind Ósk Kristjánsdóttir, Þórunn Birna Jónsdóttir, Hulda Ósk Jónsdóttir, Ruth Ragnarsdóttir(Unnur Mjöll Hafliðadóttir'90), Helga Björk Heiðarsdóttir.

Fréttaritari mætti örlítið eftir að leikur hófst en frétti hjá viðstöddum að hann hefði ekki misst af miklu. Að sjálfsögðu var undirritaður á bolnum en fékk þó lánaða brúna úlpu á svæðinu sem tónaði sérstaklega vel við brúnar buxurnar! 

Völsungsliðið reyndi stutt spil úti á velli á meðan þær höfðu boltann sem leit vel út þótt oftast væri ekki um nægilega góða ákvörðunartöku að ræða á síðasta hluta vallarins. Fjölnisliðið var meira tilbúið í að stjórna framan af leik en sterkur varnarmúr Völsunga með örugga Önnu Guðrúnu fyrir aftan sig átti aldrei í vandræðum með það. Fjölnisstúlkur áttu tvær skottilraunir utan af velli sem Anna Guðrún sá örugglega við.

Á 41.mínútu kom fyrsta mark leiksins. Gott miðjuspil skilaði boltanum út til vinstri á Ruth sem lyfti boltanum inn fyrir varnarlínu heimastúlkna í hlaupalínu Huldu Óskar. Markvörður Fjölnis rauk út í boltann en Hulda Ósk var á undan, nikkaði boltanum framhjá henni og kláraði þröngt færið af mikilli yfirvegun. 1-0 fyrir Völsungi og stelpurnar sem og Völsungar á pöllunum fögnuðu gríðarvel. Staðan því 1-0 í hálfleik.

Fjölnisstúlkur lágu þungt á gestunum í síðari hálfleik án þess að skapa sér dauðafæri, en varnarleikur okkar var mjög svo yfirvegaður. Við áttum þó ágætis skyndisóknir og í eitt skiptið virtist sem að Helga Björk væri tekin niður í teignum en ákaflega smávaxinn dómari leiksins var ekki á sama máli.  

Stuttu síðar vann Helga Björk skallabolta á miðjunni og skallaði til Huldu sem sendi aftur á Helgu í fyrsta sem einnig tók boltann í fyrsta inn fyrir á Huldu sem átti vinstri fótar skot framhjá fjærstönginni. Vel útfærð skyndisókn hjá stelpunum eftir hreinsun Þórunnar Birnu úr teignum. Að lokum flautaði dómarinn til leiksloka og glæsilegur 1-0 sigur því niðurstaðan. 

Ég held þetta hafi verið einn besti leikur stelpnanna í sumar. Þær voru ákaflega duglegar og kláruðu sig algjörlega enda var farið að draga af fremstu mönnum og miðjunni undir lokin. Jóney leiddi varnarlínuna vel og bjargaði oft á tíðum og einnig átti Anna Guðrún hörkuvakt í markinu. Fremst létu Helga og Hulda sérstaklega finna fyrir sér og gáfu gestunum aldrei frið eða andrými á boltanum. Berglind og Dagbjört vörðu vörnina vel fyrir beinum áhlaupum og hirtu mikið af skallaboltum. Til þess að undirstrika enn frekar baráttuna í stelpunum vörðu Jóney, Berglind og Ásrún til að mynda allar skot í teignum eftir að hafa komið sér fyrir og í uppbótartíma kastaði Anna Halldóra sér fyrir skot af markteig og bjargaði.

Afar öflugur sigur hjá stelpunum sem eiga einungis einn leik eftir af sínu sumri. Þær mega endilega mæta með sömu baráttu í heimaleikinn gegn Grindavík um næstu helgi og enda sumarið með stæl.