Völsungar lögðu Skagastúlkur 4-0

Elva var valin maður leiksins.

Í dag mættu Völsungsstúlkur liði ÍA í B-riðli 1. deildar Íslandsmótsins og fór leikurinn fram á Húsavíkurvelli í blíðskaparveðri. Þar sem knattspyrnurýnir 640.is var fjarri góðu  gamni í dag er það skrifað hér Í örstuttu máli að þær grænklæddu unnu góðan sigur á skagastúlkunum. Lokatölur leiksins urðu 4-0 og hefðu þær vel getað verið nokkru hærri.

Undir lok fyrri hálfleiks skoraði Berglind Ósk Kristjánsdóttir fyrsta mark leiksins og gengu stúlkurnar til hálfleiks með eins marks forystu. Hafrún Olgeirsdóttir kom sterk inn af bekknum í hálfleik og skoraði tvö síðustu mörk leiksins. Í millitíðinni skoraði Elva Héðinsdóttir sitt fyrsta mark fyrir Völsung og var virkilega gaman að fylgjast með fögnuði hennar vegna þess. Elva var síðan valin maður leiksins og fékk að launum gjafapakkningu frá Nivea en 640.is stendur að vali á manni leiksins í samvinnu við Nivea á Íslandi.

Berlind Ósk skorar hér fyrsta mark leiksins.

Hafrún skoraði tvö mörk og hér er annað þeirra í uppsiglingu.

Eva Björk með fimm leikmenn ÍA á hælunum. Hvar voru hinir sjö.

Elva lætur skotið ríða af og örskömmu síðar hafði hún skorað sitt fyrsta mark fyrir meistaraflokk Völsung í íslandsmeistaramóti sem og í bikarkeppnum.

Og því var auðvitað vel fagnað.