Völsungar gerðu jafntefli suður með sjó.

Hrannar jafnaði leikinn.

Völsungar náðu að safna einu stigi til viðbótar í sarpinn þegar þeir gerðu jafntefli við Reyni í Sandgerði. Það voru þeir Bjarki Baldvinsson og Hrannar Björn Steingrímsson sem skorðuðu mörk okkar manna.

Annars segir svo frá leiknum á fótbolti.net

Völlurinn var blautur og þungur í Sandgerði í dag. Leikurinn hófst klukkan 12:00 þar sem nú eru Sandgerðisdagar í gangi. Reynismenn voru mun betri í fyrri hálfleik og skoruðu þrjú mörk en einungis eitt þeirra taldi. Jóhann Magni Jóhannsson skoraði úr vítaspyrnu og þá var dæmt af mark vegna hendi og vegna brot á markverði.

Gestirnir frá Húsavík náðu að jafna rétt fyrir leikhlé þegar að Bjarki Baldvinsson skoraði ágætt mark.

Í síðari hálfleiknum var meira jafnræði og Reynismenn komust yfir úr vítaspyrnu sem Páll Guðmundsson skoraði úr. Völsungar lögðu ekki árar í bát og Hrannar Björn Steingrímsson jafnaði eftir laglegt einstaklingsframtak. Reynismenn fengu aðra vítaspyrnu þegar korter var eftir, Páll skoraði en Darko Milojkovic hafði farið of snemma inn í teiginn og því varð að endurtaka spyrnuna. Páll fór aftur á punktinn en í þetta skipti varði Björn Hákon Sveinsson markvörður Völsungs.

Darko fékk ágætis færi til að skora sigurmarkið um fimm mínútum síðar en kaus að senda boltann og færið rann út í sandinn. Undir lokin fékk Ólafur Ívar Jónsson úr liði Reynis, síðan að líta sitt annað gula spjald og þar með rautt en lokatölurnar í Sandgerði 2-2.