Völsungar gerðu jafntefli í fallbaráttuslagnum við ÍH

Á Húsavík mættust fyrr í kvöld Völsungur og ÍH í veðri sem ætti að teljast fínt til knattspyrnuiðkunar. Góðmennt var í brekkunni en það er það iðulega á Húsavíkurvelli!  Heimamenn byrjuðu leikinn af krafti og hörku sem skilaði þeim marki fljótlega. Hallgrímur Mar Steingrímsson fékk þá boltann úti á vinstri kantinum á miðjum vallarhelmingi ÍH-manna. Hann tók sig til og lék glæsilega á 4 varnarmenn áður en hann lagði boltann í fjærhornið framhjá markmanni gestanna. Frábært einstaklingsframtak og útlitið bjart fyrir heimamenn. 1-0.

 

Þeir héldu áfram af krafti og á 10.mínútu spiluðu þeir vel saman sem endaði með því að Elfar Árni Aðalsteinsson fékk boltann hægra megin í teignum. Boltinn datt illa fyrir hann og þegar hann lét skotið ríða af var varnarmaður búinn að kasta sér fyrir. Boltinn barst þá út á Guðmund Óla Steingrímsson sem átti skot á lofti vel fjarri netmöskvunum.

 

Heimamenn slökuðu alltof fljótt á og ÍH menn gengu á lagið og fóru að færa sig framar. Mikið var um að boltinn væri í háloftunum og lítið var um forkunnarfagran fótbolta. Fyrsta sókn gestanna sem talandi er um kom á 16.mínútu. Þá kom há sending inn á vítateig Völsunga og framherji tók boltann niður og féll svo við. Línuvörðurinn flaggaði og dómarinn benti á punktinn en breytti því svo umsvifalaust í aukaspyrnu þegar hann sá línuvörðinn gefa merkinguna. Framherjinn tók boltann niður með hendinni og aukaspyrna sem heimamenn fengu. Gestirnir voru ekki parsáttir og má gera ráð fyrir að línuvörðurinn hafi ekki fengið að heyra neinar kvöldbænir frá þeim þar sem þeir stóðu og ræddu við hann. Réttilega dæmd þó aukaspyrna og áfram hélt leikurinn.

 

 

Á 21.mínútu kom löng sending frá gestunum upp hægri kantinn þar sem að kantmaðurinn stakk sér. Hann kom boltanum á fjærstöng þar sem hann var skallaður í stöng og út aftur. Þar kom ÍH maður og ætlaði að þrykkja knettinum í netið en Aron Bjarki kastaði sér stórglæsilega fyrir og boltinn kastaðist út í teig. Þar var mættur annar ÍH maður sem setti boltann í fjærhornið þvert á hlaupaleið markvarðarins. Skammgóður vermir björgunin hjá Aroni og vel klárað hjá gestunum. 1-1 og allt í járnum.

Lítið marktækt gerðist eftir þetta í fyrri hálfleik fyrir utan hálfhlægileg langskot frá báðum liðum. Þó átti Völsungurinn Bergur Jónmundsson góða sendingu fram á lokamínútu hálfleiksins sem Elfar Árni tók niður fyrir Rafnar Orra Gunnarsson sem átti skot yfir frá vítateigslínu. 1-1 var staðan í hálfleik og ljóst var erfiðar 45 mínútur væru framundan hjá báðum liðum.

Völsungar komu grimmir til síðari hálfleiks og átti Hallgrímur Mar flotta aukaspyrnu inn á markteig þar sem Elfar Árni skallaði að marki en vel var varið. Markmaðurinn kastaði boltanum snöggt út til hægri þar sem að Bjarki Baldvinsson stal boltanum vel af bakverðinum með skriðtæklingu, stóð upp og lék á hann áður en hann var tekinn niður við vítateigshornið. Glæsilega gert hjá Bjarka og vel unnin aukaspyrna. Hallgrímur tók spyrnuna og Elfar Árni skallaði boltann í slánna og yfir.

Örstuttu síðar var mikið klafs við teig ÍH manna og boltinn barst til Bjarka sem tók boltann vel til hliðar og náði flottu skoti sem að markvörðurinn blakaði yfir.

Á 60.mínútu fengu gestirnir skyndisókn og framherji þeirra var kominn einn í gegn á móti Birni Hákoni þegar hann var sparkaður niður og var þar að verki Halldór Fannar Júlíusson sem var leiðinlega seinn á ferðinni í þetta skiptið. Harkalegt brot en ekkert dæmt og gestirnir urðu alveg æfir. Þeir grétu Björn bónda þó ekki lengi því önnur skyndisókn var innan handar og á 62.mínútu brunuðu þeir upp völlinn og fjölmenntu á varnarmenn Völsunga, alveg heilir 3 á 2 og náðu frábærri færslu á boltanum frá vinstri til hægri þar sem að kantmaður þeirra var einn á auðum sjó og lagði boltann snyrtilega í fjærhornið framhjá Birni. 1-2 staðan allt í einu orðin og útlitið dekkra fyrir heimamenn.

Völsungar fóru þá að færa sig framar á völlinn og hinn öskufljóti Stefán Björn Aðalsteinsson var settur inn á. ÍH menn vörðust og beittu skyndisóknum sem vantaði alltaf lokahnykkinn á þegar á síðasta þriðjung vallarins var komið.

Hallgrímur átti frábæran háan bolta inn fyrir á 74.mínútu sem datt niður rétt fyrir utan vítateig gestanna. Stefán Björn var sloppinn einn í gegn og tók boltann í fyrsta framhjá markmanninum sem ætlaði sér að sparka í boltann og negldi Stefán niður. Háværar beiðnir um aukaspyrnu og rautt spjald hvaðanæfa að högguðu ekki dómaranum sem að flautaði ekki og lét leikinn halda áfram. 

Á 81.mínútu átti Guðmundur Óli Steingrímsson frábæra stungusendingu sem datt niður við fætur Elfars Árna sem lagði boltann snyrtilega í fyrsta í fjærhornið. Frábært mark og vel klárað. Völsungum var aðeins léttar og fögnuðu við hornfánann þar sem þeir bannbræður Sveinbjörn Már Steingrímsson og Davíð Þórólfsson voru mættir! 2-2 og spennan í algjöru hámarki.

Mikið var um miðjuþóf og baráttu eftir þetta en heimamenn reyndu mikið af stungusendingum en Stefán Björn var oft dæmdur rangstæður. Ein sendingin var á Berg Jónmundsson sem virtist vera sloppinn í gegn þegar flaggið fór á loft en flaggað var á Stefán sem var hvergi nálægur Bergi. Bergur, í mótmælaskyni, sparkaði boltanum virkilega ósvalt langt í burtu og uppskar aðeins gula spjaldið fyrir það.

Á 91.mínútu átti Guðmundur Óli frábæra sendingu með jörðinni innfyrir þar sem Stefán Björn var ekki rangstæður og tók boltann framhjá varnarmanni í fyrstu snertingu. Varnarmaður renndi sér og reyndi að sparka boltanum í burtu en tók næstum Stefán niður. Stefán stóð þetta af sér og skaut en beint á markmanninn sem var kominn á móti. Gullið tækifæri fór þar forgörðum fyrir heimamenn en leikurinn var flautaður af fljótlega eftir það. 2-2 lokastaðan og engin niðurstaða virðist ætla að fást í þessa botnbaráttu.

Bræður skemmtilega samstíga í fagninu, Hallgrímur Mar og Hrannar Björn.

Elfar Árni með boltann sem andartaki síðar lá í netinu, staðan 2-2.

Hinn öskufljóti Stefán Björn Aðalsteinsson að sleppa í gegn. 

Mikið var um háloftabolta í leiknum sem að mati fréttaritara er ekki vænlegt til árangurs.