Útiæfing í mars!

Halldór Geir með boltann. Mynd/HH

Breyttir hljóta tímarnir að teljast á Húsavík en meistaraflokkur karla æfði á grasi fyrr í dag, þann 23.mars. Æft var á efri vellinum en vanalega hefur liðið ekki byrjað að æfa á grasi fyrr en í maí sökum veðurfars. 

Vorkálfarnir byrjuðu á skokki áður en farið var í tveggja manna æfingar með bolta og í kærkominn reit á grasi. Ýmsar útgáfur af spili voru svo í restina en gleðin leyndi sér ekki hjá mönnum.

Allir voru ánægðir með að fá að æfa á grasi þótt aðstæður hafi mögulega ekki boðið upp á fyrirmyndar knattrakningu eða sendingar.

,,Þetta var snilld þótt völlurinn sé kannski ekki upp á sitt besta. En mjög góð tilfinning að komast út í ferska loftið og sparka smá í bolta,” sagði Halldór Geir Heiðarsson við fréttaritara um æfinguna í dag.

Hafþór Hreiðarsson mætti á svæðið og tók nokkrar myndir.

Bræður í sókn, Hrannar í marki.

Bergur Coloccini reynir skot.