Umfjöllun: Fyrirliðinn stal sigrinum í lokin

Harpa tryggði öll stigin í kvöld

Kvennalið Völsungs sigraði Tindastól, 2-1, er næst síðasta umferð B-riðils fór fram í kvöld en liðin mættust á Húsavíkurvelli í fallegu sumarveðri. Mörk Völsungs skoruðu Helga Björk Heiðarsdóttir og Harpa Ásgeirsdóttir.

Byrjunarlið Völsungs: Anna Jónína Valgeirsdóttir, Berglind Ósk Kristjánsdóttir, Jóney Ósk Sigurjónsdóttir, Jana Björg Róbertsdóttir, Sigrún Lilja Sigurgeirsdóttir (Hulda Ósk Jónsdóttir '73), Anna Halldóra Ágústsdóttir, Helga Björk Heiðarsdóttir, Ruth Ragnarsdóttir, Harpa Ásgeirsdóttir (f), Kristín Lára Björnsdóttir (Heiðdís Hafþórsdóttir '54), Ragna Baldvinsdóttir (Elma Rún Þráinsdóttir '63).

Leikurinn hófst í smá vindi en það lægði vel fljótlega og frábært fótboltaveður sem að liðin fengu nánast allan leikinn í sumarsól á Húsavíkurvelli í kvöld. Heimastúlkur byrjuðu leikinn af krafti fyrstu tíu mínúturnar og var útlit fyrir að þær myndu klára þennan leik vel og örugglega.

Fyrsta mark leiksins skoruðu hinsvegar gestirnir en allt í einu upp úr engu lá boltinn í netinu. Miðjumaður Tindastóls sparkar þá lausum bolta frá miðju hátt í loftið sem virtist á leið yfir markið en hann sveif yfir Önnu Jónínu í markinu, datt undir slánna og í netið, 0-1, eftir ellefu mínútur og það virtist enginn á vellinum fatta að mark hefði verið skorað fyrr en að þjálfari gestaliðsins öskraði inn á völlinn "Stelpur! viljiði fagna!!."



Eftir um hálftíma leik áttu Völsungar tvær fínar tilraunar en Ruth Ragnarsdóttir hlóð í gott skot sem endaði í stönginni og Harpa Ásgeirsdóttir átti fínt skot sem fór rétt framhjá markinu.

Á 38.mínútu leiksins skoruðu heimastúlkur mark sem dæmt var af. Helga Björk Heiðarsdóttir var þar að verki en stuðningsmenn í brekkunni voru harðir á því að þarna hafi verið um rangan dóm að ræða. Lítið annað gerðist fram að leikhléi og gestirnir leiddu, 0-1, í hálfleik.



Seinni hálfleikur var gjörsamlega eign Völsunga. Þær sóttu frá því að hann fór af stað og hlangað til að þessu var lokið. Á 54.mínútu var bjargað á línu eftir skot frá Ruth og allir biðu eftir því að jöfnunarmarkið myndi detta.

Það kom svo loks á 70.mínútu leiksins en þá skoppaði boltinn inn fyrir beint fyrir framan lappinar á Helgu Björk Heiðarsdóttir sem hamraði hann í netið af miklu öryggi og staðan jöfn, 1-1, vel klárað hjá Helgu.


                         Helga Björk Heiðarsdóttir skorar hér jöfnunarmarkið

Völsungsstúlkur héldu áfram að sækja og sækja en þær ætluðu sér að loka dæminu. Þegar að tíu mínútur voru eftir bjargaði markvörður gestanna frábærlega er hún varði skalla frá Berglindi eftir horn og pressan þyngdist enn meira að marki Tindastóls.

Sigurmarkið datt svo þegar að ein mínúta var eftir af venjulegum leiktíma. Það var fyrirliðinn Harpa Ásgeirsdóttir sem tryggði öll stigin með marki af stuttu færi eftir mikinn hamagang í teignum og stelpurnar fögnuðu líkt og um áramótapartý væri að ræða. Virkilega sætt og stuttu síðar flautaði dómari leiksins og öll stigin Völsunga.

             Hér má sjá Hörpu fyrirliða tryggja öll stigin undir lok leiksins

Stelpurnar hafa nú unnið þrjá leiki í röð og virðist sem ákveðin hugarfarsbreyting hafi átt sér stað innan hópsins sem smalar inn punktunum. Liðið situr í fjórða sæti deildarinnar með 19 stig þegar að ein umferð er eftir og spila þær sinn lokaleik í sumar um næstu helgi er sterkt lið HK/Víkings kemur í heimsókn á Húsavíkurvöll.

NIVEA-stúlka leiksins: Jóney Ósk Sigurjónsdóttir

               Hafrún Olgeirsdóttir afhendi Jóney Ósk verðlaunin í leikslok















Tengdar greinar:
Jói Páls: Við áttum leikinn frá A til Ö
Helga Björk: Hefðum átt að skora fleiri mörk

Myndir: Hjálmar Bogi