Umfjöllun: Fyrsti sigurinn lætur enn bíða eftir sér

Ásgeir var valinn maður leiksins í dag

Það gengur hvorki né rekur hjá Völsungum sem í dag mættu Fjölnismönnum hér á Húsavíkurvelli. Ágætlega var mætt í brekkuna svona á miðað við veður og bauð vel votur völlurinn upp á flottan leik. Það er ótrúlegt að það hafi munað 29 stigum á liðunum fyrir leikinn hér í dag því það sást á spilamennsku liðsins að svona mikill munur er alveg gjörsamlega fáranlegur. Svo vægt sé til orða tekið. Fjölnisliðið er ekki svona gríðarlega sterkt og Völsungsliðið er ekki svona gríðalega slakt.

Byrjunarlið: Sveinbjörn Ingi Grímsson (Snæþór Haukur Sveinbjörnsson ’45), Sigvaldi Þór Einarsson, Péter Odrobéna, Pétur Ásbjörn Sæmundsson, Sveinbjörn Már Steingrímsson, Halldór Fannar Júlíusson, Guðmundur Óli Steingrímsson, Halldór Geir Heiðarsson, Hrannar Björn Steingrímsson (f), Þorvaldur Sveinbjörnsson (Eyþór Traustason ’82), Ásgeir Sigurgeirsson (Rafnar Smárason ’72)

Gul spjöld: Pétur Ásbjörn Sæmundsson, Hrannar Björn Steingrímsson.

Leikurinn í dag hófst fjörlega og greinilegt að bæði lið ætluðu að blása til sóknar. Fjölnisliðið hafði yfirhöndina framan af án þess þó að skapa sér mikla hættu. Völsungar héldu boltanum betur en oft áður og urðu sóknirnar fyrir vikið hættulegri. Ein slík bar einmitt árangur eftir um korters leik. Þá vinnum við boltann fyrir framan okkar eigin vítateig og leggjum af stað í skyndisókn. Hrannar ber boltann upp að miðju, gefur á Ásgeir sem þeytist  framhjá einum varnarmanni gestanna, kemur boltanum á vinstri löppina og afgreiðir snyrtilega í hornið fjær. Hnitmiðað. Þetta þarf ekki að vera fast! Frábær byrjun og þetta kom engum í brekkunni á óvart því Fjölnismenn höfðu verið frekar værukærir og virtust halda það Völsungsliðið væri gefin veiði.

Fjölnismenn setja út klærnar og reyna að byggja upp sóknir sem eru brotnar niður af varnarmönnum Völsunga. Það kom því öllum í opna skjöldu þegar Fjölnismenn jöfnuðu því þá kom skot fyrir aftan miðju, af 50 metra færi, sem sveif svona lóðbeint í markvinkilinn. Það er hægt að setja spurningamerki við Sveinbjörn í markinu en engu að síður átti enginn von á þessu. 99 af hverjum 100 tilraunum færu forgörðum, það er svo einfalt. Fjölnismenn fögnuðu vel og innilega og leikurinn orðinn jafn að nýju.

Við þetta dettur leikurinn niður en eftir um hálftíma leik höfðu þeir gulkæddu bætt tveimur mörkum við á þriggja mínútna kafla. Fyrst eru mistök í vörninni þess valdandi að sóknarmaður gestanna kemst í sendinguna, fer upp að endamörkum og leggur boltann út í teiginn þar sem miðjumaður kemur á ferðinni og klárar í hornið nær. Seinna markið er keimlíkt, fyrirgjöf upp að endamörkum og boltinn lagður út í teig þar sem það nákvæmlega sama gerist – miðjumaður mætir og klárar. 1-3 og korter eftir af fyrri hálfleik.

Eftir þetta eiga bæði lið álitlegar sóknir án þess þó að skapa mikla hættu. Sveinbjörn ver þó mjög vel í eitt skiptið og hélt okkur í leiknum. Fjölnismenn skora síðan mark í uppbótartíma fyrri hálfleiks sem var dæmt af vegna rangstöðu.

Í hálfleik var gerð ein skipting. Sveinbjörn Ingi fór út af og í hans stað kom Snæþór Haukur. Seinni hálfleikurinn var ekki eins fjörugur og sá fyrri, fá færi litu dagsins ljós og það var ekki fyrr en á 70. mínútu að smá líf kviknaði. En þá björguðu Fjölnismenn á línu, og undirritaður telur nokkuð líklegt að sá dómur hafi verið hárréttur hjá annars undarlegum dómara leiksins. Í kjölfarið var gerð skipting, markaskorarinn Ásgeir settist á bekkinn og í hans stað kom Rafnar Smárason. Tíu mínútum síðar kom síðan Eyþór Traustason inn á í stað Þorvaldar Sveinbjörnssonar.

Leikurinn fjaraði út og sanngjarn sigur Fjölnismanna staðreynd. Jöfnunarmarkið einkenndist af ótrúlega mikilli heppni, annað markið færðum við þeim á silfurplatta og í kjölfarið gengu þeir á lagið og settu þriðja markið á okkur. Þrjú mörk í einum hálfleik eru þremur mörkum of mikið, nema þau endi í neti andstæðinganna. Ljósu punktarnir eru þeir að liðið hélt hreinu í seinni hálfleik, spilaði boltanum ágætlega innan liðsins og spilaði meiri sóknarleik en oft áður.

Maður leiksins í dag var markaskorarinn Ásgeir Sigurgeirsson en hann var virkilega líflegur í framlínu liðsins og mjög jákvætt að fá hann til baka. Hann á eftir að vera drjúgur undir lokin.