Tap í Fellabæ

Lið Völsungs mætti lið Hattar frá Egilsstöðum í annarri deildinni fyrr í kvöld. Þar sem heimavöllur Hattarmanna sem kenndur er við einn besta þrístökkvara sem sögur fara af var ekki í leikhæfu ásigkomulagi fór leikurinn fram á gervigrasinu á Fellavelli í Fellabæ.

 

Það voru heimamenn sem byrjuðu betur í kvöld áttu þeir nokkrar marktilraunir á upphafsmínútum leiksins án þess þó að ógna marki gestanna frá Húsavík verulega.  Hattarmenn fengu meðal annars tvær aukaspyrnur skammt fyrir utan vítateig völsunga en náðu ekki að gera sér mat úr þeim.

 

Á 33. mínútu kom hættulegasta færi Völsunga í fyrri hálfleik, boltinn barst þá inn fyrir vörn Hattar og á Aron Bjarka sem var ágætlega staðsettur á markteig en hann náði illa til boltans og slakur skalli fór framhjá markinu.

Á 40. mínútu misstu leikmenn Völsungs boltann klaufalega frá sér og boltinn barst út í horn þar sem Garðar Már Grétarsson átti lélega fyrirgjöf sem fór yfir Steinþór í markinu og endaði í fjærhorninu 1-0 fyrir Hött og þannig var staðan í hálfleik.

Völsungar byrjuðu seinni hálfleikin betur en þann fyrri og áttu fljótlega skot að marki sem þó var hættulaust.

Á 57. mínútu varði Steinþór markvörður Völsunga mjög vel og í kjölfarið komust Völsungar í Sókn en Kristján Gunnar skaut yfir markið.

Völsungar sóttu í sig veðrið eftir því sem leið á hálfleikinn greinilega staðráðnir í því að jafna leikinn. Leikmenn Hattar færðu að sama skapi aftar á völlinn og vörðust sóknaraðgerðum Völsunga vel.

Þegar ein mínúta var eftir af þessum hefðbundnu 90 fengu Völsungar besta færi leiksins þegar Hafþór fékk góða sendingu inn fyrir vörn Hattarmanna, tók boltann á lærið og lyfti honum yfir markvörð Hattar og því miður örlítið yfir markið líka.

Á lokaandartökum leiksins fengu Völsungar svo aukaspyrnu rétt fyrir utan vítateig Hattar, sú spyrna var hins vegar framkvæmd í fljótfærni og þar með rann síðasta tækifæri gestanna frá Húsavík til þess að jafna þennan leik út í sandinn.

Steinþór markvörður Völsunga var trúlega þeirra besti maður í leiknum, virkaði traustur í flestum aðgerðum og markið sem liðið fékk á sig verður ekki skrifað á hann. Þá vöktu útspörkin hans verðskuldaða athygli og er það mál manna að önnur eins útspörk hafi aldrei sést á Héraði

Stuðningsmenn Völsungs voru ekki margir á Fellavelli fyrir utan bílstjóra liðsins, þá Rúnar Ara og Aðalstein Óskarsson, var Elfar Árni Aðalsteinsson (sem tók út refsingu fyrir rautt spjald) eini stuðningsmaður þeirra grænklæddu í upphafi leiks. Fljótlega bættist þó Björn sonur Halldórs sýslumanns í hópinn en hann er búsettur á Egilsstöðum og ver mark Hugins frá Seyðisfirði í frístundum. Skammarlegt að ekki einn einasti stuðningsmaður Völsungs, búsettur á Húsavík, skuli hafa séð fært renna austur til að styðja sína menn. 

Völsungar fara því án stiga yfir öræfin og norður til Húsavíkur í kvöld með þeim Aðalalsteini og Rúnari eftir leik sem bauð ekki upp á mörg marktækifæri og jafntefli hefði trúlega verið eðlilegasta niðurstaðan. 

Aðalsteinn gerði fjölmargar, rökstuddar athugasemdir við störf dómarans á Fellavelli í kvöld.

 

Ljósmynd Leifur Þorkelsson íþróttafréttaritari 640.is á Héraði.