Stórsigur á Sandgerðingum

Elfar Árni fékk súkkulaðiskóinn.

Hressandi rok og smávegis rigning var á Húsavíkurvelli í dag þegar Völsungur tók á móti Reyni úr Sandgerði á Húsavíkurvelli.

Reynismenn byrjuðu grimmir og voru ekki lengi að koma sér í 0-1. Völsungar töpuðu boltanum ofarlega á vellinum, gestirnir brunuðu í skyndisókn og áttu stungusendingu innfyrir vörnina sem Þorsteinn Þorsteinsson kláraði vel. 0-1 eftir 1.mínútu og 13 sekúndur.

Gestirnir ætluðu sannarlega að láta kné fylgja kviði og aukaspyrna þeirra utan af kanti örskömmu síðar small í samskeytunum. Hurð skall þar nærri hælum og var eins og viðvörunarbjöllum hringdi loks hjá heimamönnum sem tóku sig á.

Heimamenn jöfnuðu svo leikinn á 14.mínútu. Gunnar Jósteinsson átti stungusendingu upp í hornið þar sem Hafþór Aðalgeirsson sendi boltann fyrir. Elfar Árni Aðalsteinsson tók þar vel við boltann, lék á varnarmann og skaut boltanum í markhornið. 1-1

Aðeins mínútu síðar slapp Elfar Árni í gegn og lék á markvörðinn áður en hann féll til jarðar. Boltinn barst til Hrannars Steingrímssonar sem skaut að marki en varnarmaður bjargaði á línu. Elfar Árni taldi sig ekki eiga að fá víti enda hafi hann runnið til í bleytunni og því vel dæmt hjá Ingvari Erni Gíslasyni sem átti prýðis leik.

Á 20.mínútu komust heimamenn í 2-1. Elfar Árni fékk þá boltann fyrir utan teig og stakk honum inn fyrir á Bjarki Baldvinsson. Hann skaut að marki en Aron Árnason í marki gestanna varði boltann út í teig. Þar var títtnefndur Elfar Árni mættur og kláraði færi sitt vel.

Yfirhöndin var heimamanna og lokuðu þeir vel á sóknaraðgerðir Reynismanna. Hafþór Aðalgeirsson og Hrannar Steingrímsson fengu ákjósanleg færi í sömu sókninni en Aron í markinu og varnarmaður vörðu þau skot vel.

Eftir frábæra sókn og samspil fremstu manna Völsunga skoraði svo Bjarki Baldvinsson eftir sendingu inn fyrir frá Elfari Árna. 3-1 eftir 41.mínútu og var staðan þannig í hálfleik.

Heimamenn hófu seinni hálfleikinn af sama krafti og þeir enduðu þann fyrri. Elfar Árni tók boltann niður fyrir utan teig Reynismanna og lék á tvo varnarmenn áður en hann var tekinn niður. Jóhann Páll Ástvaldsson tók aukaspyrnuna og lenti boltinn í jörðinni rétt fyrir framan Aron í markinu sem missti boltann út og þar var mættur Hrannar Steingrímsson sem fylgdi eftir af harðfylgni og skaut í hornið. 4-1 eftir 47.mínútna leik.

Bjarki fékk svo aukaspyrnu fyrir Völsunga úti á kanti skömmu síðar. Hrannar tók hana og sendi boltann inn á markteig þar sem Elfar Árni reis hæst og skallaði knöttinn í mitt markið. 5-1 eftir 53.mínútna leik.

Völsungar héldu áfram að sækja og var refsað fyrir það á 67.mínútu. Töpuðu boltanum á vallarhelmingi gestanna sem brunuðu fram og eftir stungu inn fyrir fékk Pétur Jaaide boltann, lék á Steinþór í markinu og skoraði. Staðan því orðin 5-2.

Eftir þetta var sem að allur vindur væri úr Sandgerðingum. Völsungar héldu þeim algjörlega á sínum vallarhelmingi og vörn heimamanna var snögg að færa boltann fram aftur eftir hreinsanir. Reynismenn vörðust þó vel og náðu oftast að komast inn í síðustu sendingu.

Kristján Steinn Magnússon, sem hafði komið inn á sem varamaður hjá Völsungum, slapp í gegn þegar 10 mínútur lifðu leiks og lék vel á markvörðinn áður en hann skaut en varnarmaður hafði unnið vel til baka og bjargaði á línu.

Annar varamaður, Aðalsteinn Jóhann Friðriksson, vann síðan boltann vel af aftasta varnarmanni á 91.mínútu og nýtti færi sitt vel og kom heimamönnum þar með í 6-2. Urðu það lokatölur og gengu Völsungar stoltir af velli eftir þessa frammistöðu. Elfar Árni var valinn maður leiksins og hlaut súkkulaðiskóinn að launum!

Leikur liðsins í dag var heilt yfir mjög góður. Við byrjuðum illa en hristum mjög snemma af okkur slenið og fórum að gera þetta eins og menn. Mikil barátta og endalaus vinnsla skapaði okkur mörg færi og vorum við sívinnandi boltann um allan völl. Elfar Árni spilaði lykilhlutverk uppi á topp og átti þátt í öllum fimm mörkunum sem við skoruðum með hann inn á vellinum.

Bjarki var mjög góður í dag og einnig fannst mér Haffi virkilega öflugur í því sem hann var að gera þótt alltaf megum við allir laga sendingarnar. Jóhann Páll fannst mér koma virkilega vel inn í dag og eiga góðan leik.

Aðrir leikmenn liðsins skiluðu góðri frammistöðu og það er ekki hægt að segja að einhver hafi átt lélegan leik. Við vorum mun meira skapandi en í síðasta deildarleik og menn vonandi byggja ofan á þennan sigur er við mætum Árborg á fimmtudaginn næsta. Sýnd veiði en alls ekki gefin. Við þurfum að mæta með sigurviljann og ákveðnina inn í þann leik drengir.

Annars mega menn vera stoltir með þennan sigur í dag og vonandi höldum við áfram á þessari braut!

Byrjunarlið Völsunga: Steinþór, Stefán Jón, Gunni Siggi, Jónas, Jóhann Páll, Haukur, Arnþór, Bjarki, Hafþór, Hrannar, Elfar

Bekkur: Kjartan, Alli Jói, Ármann, Kristján Steinn, Rafnar.

Elfar Árni, Bjarki og Hrannar Björn fagna marki Bjarka.

Hrannar Björn skoraði eitt mark í leiknum.

Aðalsteinn Jóhann Friðriksson í baráttu við varnarmann Reynis og skömmu síðar lá boltnn netinu.

Elfar Árni skoraði þrennu og fékk fyrir verðlaun frá Háriðjunni sem Björn Elí afhenti.

Skoða má fleiri myndir úr leiknum hér.