Sigvaldi: Þetta verður alvöru slagur

Sigvaldi Þór Einarsson

Völsungur heimsækir Dalvík/Reyni í kvöld er 17.umferð deildarinnar fer fram og hefst leikurinn kl.19 á Dalvíkurvelli. Sigvaldi Þór Einarsson hefur spilað stórt hlutverk í liði Völsungs á tímabilinu en hann hefur spilað alla leikina nema einn og við tókum púlsinn á honum fyrir leik kvöldsins.

,,Þetta leggst gríðarlega vel í mig og hlakka mikið til þess að mæta Dalvík/Reyni í kvöld. Þeir eru með sterkt lið og þetta verður alvöru slagur. Fyrir mér eru þessir leikir eins og allir aðrir þar sem við förum inn í þá til þess að berjast og reyna að ná góðum úrslitum en þetta eru alltaf miklir baráttu leikir og það verður án efa vel tekið á því," sagði Sigvaldi Þór Einarsson spenntur fyrir leiknum í kvöld en hann segir strangar æfingar vera skila sér.

,,Við viljum vera á toppnum og tilfinningin er hrikalega góð en það er mikilvægt að klára okkar leiki og hugsa um okkur sjálfa. Við æfðum eins og brjálæðingar í allan vetur og höfum æft vel í sumar, það er að skila okkur þessum stigum," segir Sigvaldi sem að hefur átt gott sumar í vinstri bakverðinum, tekið miklum framförum og skilað sinni vinnu með sóma. Aðeins eitt lið hefur fengið færri mörk á sig en Völsungur og segir Sissi skipulag vera ástæðan fyrir því.


,,Það er engin ein skýring á því en við förum vel yfir allt, hvernig við eigum að verjast og hvernig sóknarleikurinn á að vera fyrir hvern einasta leik og ég held að það sé að skila okkur miklu. Það er mjög gott að spila með Dejan og Marko þarna aftast, þetta eru reynslubankar og eru búnir að vera frábærir í sumar," sagði Sigvaldi hóvær sem hrósar einnig hinum tveimur nýju leikmönnum liðsins.

,,Klingenberginn og Milan eru búnir að koma flott inn í þetta hjá okkur og báðir að spila vel. Pétur er að taka þetta á miðjunni og Milan búinn að setja nokkur mörk svo það er bara jákvætt."

,,Vonandi sjáum við sem flesta í brekkunni þessa leiki sem að eftir eru því endaspretturinn verður erfiður og við megum ekki gefa neitt eftir. Við þurfum á öllum að halda í þessu og fólk má ekki gleyma að við erum stærsta fjölskylda í heimi," sagði Sigvaldi að lokum en sem fyrr segir þá hefst leikurinn kl.19 í kvöld á Dalvíkurvelli og þú ert að fara þangað að öskra áfram þitt lið líkt og enginn sé morgundagurinn. ALLIR Á VÖLLINN!!