Marko Blagojevic: Þurfum að halda einbeitingu

Marko Blagojevic

,,Ég var ótrúlega ánægður að sjá boltann enda í markinu, þetta var mjög mikilvægt mark og nú þurfum við aðeins eitt stig í viðbót til að tryggja sæti í 1.deild," sagði Marko Blagojevic, Heimabakarísmaður leiksins og markaskorari eftir leikinn en Marko tryggði Völsungi sigurinn á 79.mínútu gegn Fjarðabyggð í dag.

,,Við spiluðum ágætlega í leiknum en auðvitað hafði veðrið áhrif á bæði lið og erfiðar aðstæður í dag. Það sem skipti öllu máli var að vinna og það gekk upp svo við erum ánægðir með öll stigin," bætti Marko við sáttur í leikslok.

Næsti leikur liðsins er á útivelli gegn HK. Marko segir mikilvægt að halda einbeitingu og hugsa aðeins um einn leik í einu.

,,Næsti leikur er mjög mikilvægur fyrir okkur og erum ekki að fara í Kópavoginn til þess að sækja aðeins eitt stig, við ætlum okkur sigur og ekkert annað. Það er mjög mikilvægt að við allir höldum okkur á jörðinni, bæði þeir sem hafa reynsluna og yngri strákarnir. Við þurfum að halda einbeitingu og hugsa aðeins um einn leik í einu. Það mikilvægasta er að við höldum hausnum á réttum stað og hugsum einungis um næsta leik," sagði Marko yfirvegaður en hann átti frábæran leik í dag sem hann kórónaði svo með sigurmarkinu.

,,Ég er alltaf ánægður þegar ég er kosinn maður leiksins og fæ súkkulaðiskóinn en það skiptir engu máli hver fær hann, það sem skiptir máli er að við vinnum leikinn. Nú er það bara næsti leikur og ég er klár í það," sagði Marko hógvær að lokum.



Tengdar greinar:
Umfjöllun: Einu stigi frá 1.deild
Dragan: Hugsum alltaf bara um næsta leik