Umfjöllun: Völsungar kjöldregnir á heimavelli

Byrjunarlið Völsungs: Sveinbjörn Ingi Grímsson, Sveinbjörn Már Steingrímsson, Gunnar Sigurður Jósteinsson, Pétur Ásbjörn Sæmundsson (Ármann Örn Gunnlaugsson ’79), Sigvaldi Þór Einarsson, Halldór Geir Heiðarsson, Bergur Jónmundsson (Halldór Fannar Júlíusson ’45), Jónas Friðriksson, Hrannar Björn Steingrímsson (f), Þorvaldur Sveinbjörnsson (Snæþór Haukur Sveinbjörnsson ’50), Guðmundur Óli Steingrímsson. 

Gul spjöld: Gunnar Sigurður Jósteinsson, Sigvaldi Þór Einarsson, Jónas Friðriksson.

Rauð spjöld: Sveinbjörn Ingi Grímsson, Jónas Friðriksson.

Völsungar tóku í dag á móti Grindvíkingum sem voru á toppi 1. deildar fyrir leikinn í dag en Völsungar sem fyrr á botninum með aðeins tvö stig. Því mátti búast við rimmu Davíðs og Golíats, og sú varð raunin. Grindvíkingar spiluðu á sínum styrkleikum og uppskáru góðann fjögurra marka sigur. Völsungar fengu að líta tvö rauð spjöld í leiknum og hafði það gríðarleg áhrif á leikinn, baráttan var þó til staðar og þrátt fyrir erfiðan róður var ekkert gefist upp.

Guðni Braga og Siggi Illuga voru búnir að koma sér vel fyrir hjá nýju vallarhúsi Völsunga fyrir leik og spiluðu þar hvern “hittarann” á fætur öðrum, gestum í brekkunni til mikillar gleði. 

Leikurinn byrjaði fjörlega og á fyrstu tíu mínútunum höfðu Grindvíkingar sett boltann í þverslá heimamanna og hinu meginn varði markvörður gestanna frábærlega eftir darraðadans í teignum þar sem Jónas Friðriksson náði góðu skoti að marki.
Það var síðan eftir um korters leik að boltinn hafnaði í netinu í fyrsta skiptið í leiknum, en alls ekki því síðasta. Gestirnir áttu þá góða sókn sem endaði með því að brotið var á sóknarmanni þeirra á vítateigslínunni, Grindvíkingar fá aukaspyrnu sem þeir smella beint í vinkilinn. 1-0.

Fram að þessu hafði verið jafnræði með liðunum, þó höfðu Grindvíkingar verið með beittari sóknir. Leikurinn var stál í stál þangað til um fimm mínútur voru eftir af venjulegum leiktíma, þá áttu gestirnir frábæra sókn sem endaði með marki. Staðan orðin 2-0. Völsungar neituðu þó að gefast upp og á lokamínútu fyrri hálfleiks skoraði Halldór Geir, Donni, fallegt mark sem var því miður dæmt af vegna rangstöðu. Gestirnir fóru því með tveggja marka forustu í hálfleik en Völsungar sáu að þeir gátu hæglega strítt Grindavíkurliðinu.

Í hálfleik var gerð ein breyting. Bergur Jónmundsson fór út af og í hans stað kom Halldór Fannar Júlíusson inn á. Það var varla búið að flauta leikinn á þegar Grindvíkingar spændu upp völlinn, sleppa í gegn og Sveinbjörn markmaður fellir sóknarmann þeirra í teignum. Vítaspyrna dæmd og Sveinbjörn sendur í sturtu. Snæþór Haukur Sveinbjörnsson kom inn á í sínum fyrsta leik í sumar og út af fór Þorvaldur Sveinbjörnsson, sem hafði skilað þó skilað sinni plikt af stakri prýði. Snæþór skutlaði sér í vitlaust horn og staðan því orðin 3-0 og Völsungar manni færri. Róðurinn var nógu þungur fyrir! 

Í staðinn fyrir að setja höfuðið í grasið efldust leikmenn Völsungs við mótlætið og spiluðu oft á tíðum ágætis bolta. Það bar að lokum árangur því þegar að tuttugu mínútur voru til leiksloka átti Hrannar Björn aukaspyrnu inn á teiginn sem endaði hjá Pétri Klingenberg, hann tók við boltanum og sýndi magnaða fótavinnu og kom boltanum svo að lokum í netið. Völsungar komnir á blað og nóg eftir.

Líkt og í fyrri hálfleik skoruðu Grindvíkingar svo mark en það var dæmt af vegna rangstöðu. Undirritaður sat lengst í burtu en það þótti augljóst hvað þessi dómur var rangur. Heppnin með okkur.

Þegar korter lifði leiks fékk Jónas Friðriksson að líta beint rautt spjald fyrir olnbogaskot, en eins og við vitum öll er Jónas mikið gæðablóð og olnbogaskotið því algjört óviljaverk. Valdi Páls, dómari leiksins, þekkir Jónas að vísu nákvæmlega ekki neitt og lyfti reisupassanum að öðru sinni í leiknum. Völsungar voru nú tveimur mönnum færri og tveimur mörkum undir gegn toppliði deildarinnar. Ethan Hunt, sem hefur nú leyst ófá ógerleg verkefni, hefði ekki einu sinni getað bjargað okkur núna.

Grindvíkingar gengu á lagið og sóknirnar þyngdust. Ármann Örn kom inn á fyrir markaskorann Pétur og fimm mínútum fyrir leikslok skora Grindvíkingar fjórða markið. Þeir reka svo síðasta naglann í kistuna á lokamínútu leiksins og lokastaðan því 5-1.
Maður leiksins var valinn Sigvaldi Þór Einarsson.

Gríðarlega svekkjandi tap staðreynd. Það er alltaf leiðinlegt að tapa, og sérstaklega á heimavelli. Óþarflega stórt tap að sama skapi, en vörnin opnast auðvitað upp á gátt þegar það vantar einn og tvo menn í múrinn stóran hluta leiksins. Enn bíðum við örvæntingafullir eftir stigunum þremur, sem hafa verið eitthvað feimin að láta sjá sig í sumar. Það er ekki annað hægt en að bíta á jaxlinn og eigna sér öll stigin í næsta leik sem verður gegn Selfossi, á útivelli, þann 21. ágúst.