Halldór Fannar: Þeir verja hann ekki þarna

Halldór Fannar Júlíusson

,,Þetta var ágætis mark, þeir verja hann ekki þarna," sagði Halldór Fannar Júlíusson eftir sigurinn gegn Gróttu í gær en hann skoraði eitt af mörkum Völsungs í leiknum og var það af dýrari gerðinni, falleg slumma í fjærhornið fyrir utan teig.

,,Við áttum að vera búnir að klára þetta þarna undir lokin og fengum góð tækifæri til þess. Annars var ég ánægður með þennan leik, við spiluðum góðan varnarleik í fyrrihálfleik og svo kviknaði á sókninni í seinni sem endaði með því að við kláruðum þetta og lönduðum mikilvægum stigum," sagði Halldór Fannar sem var mjög sprækur í leiknum. En hvað fannst honum um ákvörðun Sveinbjörns undir lokin þegar að hann fær rauða spjaldið?

,,Þetta var hárrétt ákvörðun og vel gert hjá honum, þetta hafði sennilega mikil áhrif á það að við fórum heim með öll stigin," sagði Dóri sem að líður vel í toppbarráttunni.

,,Það er öllu skemmtilegra að vera berjast og taka þátt í toppbarráttu heldur en botnbarráttu, það er engin spurning. Þetta er búið að ganga vel og það hefur sýnt sig að það er erfitt að vinna okkur en við höldum áfram okkar striki og á fullri ferð að okkar markmiðum einbeittir til síðasta leiks," sagði Halldór að lokum.


                 Halldór Fannar Júlíusson var frábær í leiknum gegn Gróttu

Tengdar greinar:
Umfjöllun: Dramatískur sigur þar sem vitinn vakir allar nætur
Hrannar Björn: Hann bjargaði í rauninni bara sigrinum