Hafþór Mar: Var kominn tími á að maður byrjaði að gera eitthvað

Hafþór Mar Aðalgeirsson

„Þetta var jafn leikur og bæði lið hefðu getað klárað þetta. Þeir sóttu meira en við áttum góðar sóknir framan af og eins og ég segi þá hefði sigurinn getað dottið báðu megin," sagði Hafþór Mar Aðalgeirsson markaskorari eftir, 2-2, jafntefli gegn Njarðvík en liðin mættust í 11 umferð 2. deildar á Njarðtaksvelli í dag.

„Það var algjör óþarfi að fá þessi mörk á okkur. Þeir fá víti sem var bara alls ekki víti, leikmaður þeirra missir bara jafnvægið í teignum og svo var þetta bara klaufaskapur hjá okkur í varnarleiknum í hinu markinu eftir að við missum boltann framarlega á vellinum," sagði Haffi en fannst honum erfitt að spila í bleytunni og vindinum?

„Nei mér fannst það ekki erfitt en við náðum ekki að halda boltanum nógu vel og hefðum mátt gera það betur. Þetta voru fínar aðstæður og ekkert yfir því að kvarta," segir Hafþór Mar en fara strákarnir sáttir heim með stigið?

„Já ég held það, þeir sóttu mikið á okkur og hefðu getað skorað og við líka en við getum bara verið sáttur við stigið hérna á þessum erfiða útivelli. Þetta lið er mjög gott en við erum með sterkara lið. Við vorum bara þreyttir og það er búið vera mikil törn núna plús langt ferðlag þannig við getum sætt okkur bara við eitt stig í dag," sagði Hafþór en strákarnir mæta KF næst á fimmtudaginn á útivelli, hvernig leggst leikurinn í hann?

„Leikurinn leggst vel í mig og við komum alveg brjálaðir í hann. Þurfum að sækja þrjú stig þangað og halda okkur í toppbaráttunni," sagði Haffi sem sýndi flotta takta í leiknum og fór að minna á sjálfan sig eins og við þekkjum hann.

„Það er vonandi að þetta sé komið, það var kominn tími á að maður byrjaði að gera eitthvað en ekki bara vera með," sagði Hafþór Mar að lokum en hann var mjög sprækur í fyrri hálfleik þar sem hann til að mynda skoraði og lagði upp mark.


                Hemmi bróðir kíkti á völlinn og hér spjalla bræður í leikslok

Tengdar greinar:
Umfjöllun: Hvítklæddir tóku stig á Njarðtaksvelli
Dragan: Sanngjörn úrslit