Góður sigur í fyrsta leik

14. maí

Góður sigur í fyrsta leik
Íþróttir - Ingvar Björn - Lestrar 632 - Athugasemdir ()

Elfar fékk súkkulaðiskóinn.

Það var kalt og skýjað á Húsavík þegar leikar hófust milli Völsunga og Fjarðabyggðar. Bæði lið byrjuðu leikinn á því að reyna að ná tökum á miðjunni. Gestirnir voru varkárir og pressuðu ekkert alltof hátt á vellinum. Á 11.mínútu leit fyrsta færi leiksins dagsins ljós. Hafþór Mar Aðalgeirsson sendi boltann inn á miðju á Bjarka Baldvinsson sem sótti að vörninni. Hann sendi boltann svo út til vinstri þar sem Aðalsteinn Friðriksson sótti upp að endamörkum og átti fyrirgjöf. Hún fór af varnarmanni og yfir Amir Mehica, markvörð Fjarðabyggðar, á fjærstöngina þar sem Elfar Aðalsteinsson skallaði boltann inn af stuttu færi. 1-0 fyrir Völsung.

Vont varð verra hjá gestunum á 15.mínútu en þá var Elfar að elta boltann í kapphlaupi við Andra Hjörvar Albertsson, fyrirliða Fjarðabyggðar, en Andri reif hann niður og fékk brottvísun því hann var aftasti maður. Fjarðabyggðarmenn mótmæltu örlítið en Amir markvörður var kominn nálægt boltanum þegar brotið átti sér stað.

Völsungar héldu áfram að þjarma að gestunum og á 19.mínútu bættu þeir við öðru marki. Hrannar Björn Steingrímsson tók flotta hornspyrnu sem Elfar skallaði í netið frá markteig. Vel útfært hjá drengjunum og sömuleiðis léleg dekkun hjá gestunum.

Fjarðabyggðarmenn lágu aftarlega og reyndu svo að beita skyndisóknum en áorkuðu litlu á helmingi heimamanna. Hrannar Björn átti skot rétt yfir markið og Jóhann Ragnar Benediktsson, leikmaður Fjarðabyggðar tók aukaspyrnu á hættulegum stað en skot hans fór sömuleiðis yfir markið.

Elfar, sem var valinn maður leiksins, vann svo boltann vel við vítateigshornið hægra megin og óð inn í teig og upp að endamörkum en Amir renndi sér í hann. Elfar vippaði boltanum yfir hann og fyrir markið þar sem að varnarmaður tók sig til og skallaði knöttinn á glæsilegan hátt í eigið mark. 3-0 fyrir Völsunga og leikurinn gott sem búinn.

Gestirnir ætluðu þó ekkert að hleypa fleiri mörkum inn og börðust grimmilega þótt lítið væru með boltann. Þeir skoruðu svo mark eftir aukaspyrnu Jóhanns rétt fyrir lok fyrri hálfleiks en það var dæmt af sökum rangstæðu. Boltinn var skallaður í átt að markinu og framherji þeirra ýtti boltanum yfir línuna en sá var kolrangstæður.

Seinni hálfleikur var rólegur og stjórnuðu heimamenn spilinu. Hættulegustu sóknir gestanna voru eftir hornspyrnur en Völsungar fengu alveg færi til að bæta við mörkum þótt þeim hafi ekki tekist að bæta við mörkum. 3-0 voru því lokatölur og fara Völsungar vel af stað í sumarið.