Gerða hlaut Hvatningabikar Í.F

Gerða alsæl með bikarinn.

Þorgerður Þórðardóttir, eða Gerða eins og flestir kannast við hana, hlaut Hvatningabikar Íþróttafélags fatlaða fyrir árið 2007.  Bikarinn var afhentur í gær um leið og vali á Íþróttamanni Húsavíkur var lýst.  Bikarinn er farandbikar, veittur árlega þeim einstaklingi sem að mati stjórnar Bocciadeildar Völsungs og þjálfara sýna bestu ástundun og mestu framfarir.

  Í umsögn um Gerðu segir að hún hafi starfað og keppt með Bocciadeild Völsungs nánast frá stofnun hennar.  Hún er því í hópi brautryðjenda íþróttarinnar hér á Húsavík.  Hún hefur sótt æfingar í gegnum árin af áhuga og verið virkur félagi í starfi bocciadeildarinnar.

 Þó tók Gerða sér frí frá æfingum og starfi með deildinni fyrir tveim árum en kom aftur tvíefld til baka í haust.  Því ætti þessi viðurkenning, að hljóta Hvatningabikar Í.F, að vera henni mikil uppörvun og hvatning að gera enn betur.