Enn eitt jafnteflið hjá Völsungum.

Það var fallegt veðrið þegar  Völsungar tóku á móti Hamri frá Hveragerði á Húsavíkurvelli í dag, sól skein í heiði og smá gola með því. Leikurinn var rólegur lengst framan af og lítið var um færi þar til síðustu 10 mínútur leiksins.

 

 Í hægagangi hófst leikurinn um klukkan 13:00 en fyrir utan sitt hvort langskotið hjá liðunum var lítið um að vera þar til Hallgrímur Mar Steingrímsson skoraði um miðjan hálfleikinn. Guðmundur Óli bróðir hans átti þá góða sendingu af miðjunni út til vinstri þar sem Davíð Þórólfsson spyrnti boltanum upp í hornið. Hallgrímur náði til knattarins á undan varnarmanni, lék á hann og skot frá vítateigshorninu. Boltinn hafði örlitla viðkomu í varnarmanni og lyftist því í skemmtilegum boga yfir markmannin og ofarlega í markhornið fjær. Hallgrímur fagnaði vel en sleppti þó Jónasarbolnum fræga.

 

Miðjuþófið hélt áfram og ekkert benti til þess að úr leiknum myndi rætast. Á 37.mínútu fengu Hamarsmenn aukaspyrnu úti á kanti sem sparkað var inn í teig. Boltinn fékk að fljóta í gegn og á miðjan markteiginn var mættur Haukur Sigurjón Kristjánsson sem kláraði auðveldlega. 1-1 staðan og liðin héldu miðjuþófinu áfram. Bjarki Baldvinsson vann þó boltann virkilega vel með skriðtæklingu, stóð upp og átti flotta fyrirgjöf á nær þar sem Elfar Árni átti skot sem var varið en markmaðurinn gerði mjög vel í því að koma út. Guðmundur Óli Steingrímsson átti síðan hættulegt skot rétt yfir markið á síðustu mínútu fyrri hálfleiksins.

 Í byrjun síðari hálfleiks fengu heimamenn aukaspyrnu á hættulegum stað sem Hallgrímur setti rétt yfir slánna. Nokkru síðar, á 73.mínútu nánar tiltekið, fengu þeir aðra og ákvað Guðmundur Óli að sýna bróður sínum hvernig gera ætti hlutina. Stillti boltanum upp og setti hann fallega yfir vegginn og rétt undir slánna í nærhornið. Stórglæsilegt mark og það fyrsta sem Guðmundur Óli skorar síðan hann kom aftur til Völsungs frá KA.

 Hamarsmenn fóru að pressa meira á Völsunga og meiri harka fór að færast í leikinn. Arfaslakur dómari leiksins virtist aðeins hafa gula spjaldið meðferðis en hann spjaldaði Dalibor Lazic tvisvar sinnum með því gula, en aldrei því rauða. Á 82.mínútu sækir Hamar og það kemur fyrirgjöf frá vinstri sem Sreten Djurovic missir klaufalega af. Dalibor Lazic fær boltann á fjærstöng og klárar mjög vel í hornið. 2-2 staðan orðin og virtist sem botnbaráttan yrði aðeins harðari.

 Ingvar Örn dómari virtist svo endanlega missa tökin á 91.mínútu. Þá kemur Kristján Gunnar fyrirliði Völsunga fyrir framan eigin teig og rennir sér í boltann og sparkar honum frá. Ivan Milenkovic kemur þá alltof seint á siglingunni og sparkar af öllu afli í fæturnar á Kristjáni og svífur yfir hann. Á einhvern óskiljanlegan hátt dæmir Ingvar Örn aukaspyrnu á Kristján Gunnar og gefur honum spjald!!! Úr aukaspyrnunni skoraði svo Dalibor Lazic en þá var komið á 94.mínútu en tafir urðu meðan hlúið var að meiðslum Kristjáns.

 Brjálaðir Völsungar gáfust ekki upp og fóru að sækja. Elfar Árni fékk háa sendingu inn á teig þar sem keyrt var inn í bakið á honum og hann féll við. Völsungar vildu vítaspyrnu en Ingvar dómari dæmdi aukaspyrnu fyrir utan teig. Bræðurnir Guðmundur og Hallgrímur stóðu enn saman við boltann og Guðmundur ákvað að sýna þeim yngri að það mætti alveg taka þær fastar líka. Hann hamraði boltann í gegnum vegginn og beint í vinstra hornið og jafnaði leikinn í 3-3 á 98.mínútu! Alveg æfur markmaður Hvergerðinga óð í átt að línuverði og kvartaði undan einhverju sem undirritaður veit ekki hvað var. Hann uppskar þó lítið annað en gult spjald. Gestirnir tóku miðju og flautað var til leiksloka.

 3-3 niðurstaðan í leik sem var hundleiðinlegur þar til á 80.mínútu en þá fyrst virtist sem blóð rynni í æðum leikmanna. Uppúr leiknum stóðu aukaspyrnumörkin þrjú sem öll voru falleg. Ekki hækkaði dómaratríóið standardinn á leiknum en þeir virtust engan veginn tilbúnir í leikinn og áttu oft á tíðum virkilega óskiljanlegar ákvarðanir sem féllu á báða bóga.

Hrannar Björn og Hallgrímur Mar fagna hér með bróður sínum Guðmundi Óla eftir að hann jafnaði leikinn í blálokin.

Kristján Gunnar fyrirliði Óskarsson.