Börn Loka í gull

Nú er ljóst að önnur breiðskífa Skálmaldar, Börn Loka sem kom út 2012, hefur rofið gullplötumúrinn og selst í yfir 5.000 eintökum hér á landi.

Formleg afhending fer fram í höfuðstöðvum RÚV að beiðni hljómsveitarmeðlima.

Í fréttatilkynningu frá Skálmöld segir:

" Í fyrsta lagi viljum við þakka óskaplega vel fyrir okkur, þetta er með ólíkindum, og ekkert sjálfgefið að jaðartónlist á borð við okkar hljóti náð fyrir eyrum almennings. Til þess að slíkt geti gerst verður fólk jú að fá tækifærið til að hlusta og mynda sér skoðun, því sá/sú sem aldrei hefur heyrt getur ekki notið. Það er ekkert launungarmál að ríkisútvarpið okkar, RÚV, hefur spilað hve stærstu rulluna þegar að þessum málum hefur komið hjá Skálmöld.

Í upphafi, þegar flestir höfðu sjálfsagt stimplað okkur sem durta og hávaðaseggi, var það Rás 1 sem reið á vaðið. Víðsjá hafði þá stutta umfjöllun um Skálmöld, tilurð og textagerð, og spilaði að endingu lag með okkur. Og þetta var í fyrsta sinn sem Skálmöld hljómaði í útvarpi, takið eftir því. Rásin hefur síðan reglulega fjallað um okkur, en Rás 2 þó sennilega enn meira, enda stendur tónlistin nær þeirra stíl en Rásar 1. Rás 2 hefur reynst okkur meira en vel síðustu ár, valið okkur sem plötu vikunnar þegar svo hefur hentað, sent út beint og óbeint frá tónleikum og jafnvel sett okkur í fasta spilun.

Og til að fullkomna allt hefur Sjónvarpið drepið niður fæti á okkar ferli þegar ástæða hefur þótt til með innslögum, umfjöllunum, viðtölum og jafnvel tónlistarspilun. Skálmöld er þannig berskjaldað dæmi um mikilvægi Ríkisútvarpsins. Grundvöllurinn fyrir þessari gullplötu er stuðningur fólks sem flest kynntist okkur, með beinum eða óbeinum hætti, fyrir tilstuðlan RÚV.

Fyrir hljómsveit sem kemur skakkt á meginstrauma vinsældarútvarps væru engir ljósvakavegir færir í átt til almennings án RÚV. Í ljósi þess að þessa gleðistund á ferli Skálmaldar ber upp á tíma niðurrifs og –lægingar útvarpsins okkar, höfum við borið upp þá ósk að formleg afhending fari fram innan veggja í Efstaleitinu. Með þessu viljum við auðvitað sýna þakklæti en ekki síður lýsa formlega yfir skýlausum stuðningi við RÚV, og mótmælum jafnframt harkalega yfirstandandi niðurskurði og dónaskap.

Takk RÚV, þú ert snillingur".