Framtíðarsýn Langanesbyggðar um uppbyggingu við Finnafjörð

21. jún

Framtíðarsýn Langanesbyggðar um uppbyggingu við Finnafjörð
Fréttatilkynning - - Lestrar 68

Sveitarstjórn Langanesbyggðar samþykkti á fundi sínum 20. júní 2024, stefnumörkun um uppbyggingu við Finnafjörð þar sem fram kemur framtíðarsýn sveitarfélagsins, sem og markmið og leiðir að þeim.

Í stefnunni lýsir sveitarstjórn Langanesbyggðar yfir eindregnum vilja til að vinna áfram að framgangi Finnafjarðarverkefnisins og tekur m.a. jákvætt í þær hugmyndir sem hafa verið uppi um uppbyggingu rafeldsneytisiðnaðar og landeldis í Finnafirði. Finnafjarðarverkefnið hefur verið í þróun í að verða tvo áratugi og gengur í senn út á þróun iðnaðarsvæðis og hafnar í Finnafirði.

Inn í þessi áform fléttast það óöryggi sem norðausturhorn landsins hefur búið við í orkumálum í áratugi. Til að Finnafjarðarverkefnið megi fram ganga er nauðsynlegt að vinna að lausnum í þeim efnum, bæði hvað varðar raforkutengingar og eins almennt framboð orku innan svæðisins. Í stefnumótuninni lýsir sveitarstjórn sig jákvæða gagnvart hugmyndum um þróun vindorkukosta á svæðinu, bæði til að mæta núverandi orkuþörf svæðisins og til að undirbyggja fjölbreytta verðmætasköpun í Finnafirði. Ýmsar forathuganir hafa nú þegar farið fram á borð við rekstur veðurstöðva og lífríkisathuganir. Niðurstöður þessara athugana gefa tilefni til að ætla að vindorkuver geti verið álitlegur kostur í þeim lið að útvega raforku til iðnaðar í Finnafirði.

Ýmis svæði innan sveitarfélagsins gætu verið hentug til vindorkuframleiðslu en áhugi landeigenda er að sjálfsögðu forsenda þess að hægt sé að þróa slíka kosti áfram. Jákvæð afstaða íbúa er sömuleiðis mikilvæg þegar kemur að ákvarðanatöku og ljóst að mikið samráðs- og kynningarferli þarf að eiga sér stað áður en endanlegt samþykki getur legið fyrir. Þá er sömuleiðis ljóst að áhugasamir aðilar um vindorkuframleiðslu munu þurfa að ráðast í viðamiklar umhverfisrannsóknir á svæðinu.

Ekki er síður nauðsynlegt að styrkja fjölmarga innviði í sveitarfélaginu. Í maí 2016 skrifuðu stjórnvöld og fulltrúar Langanesbyggðar, Vopnafjarðarhrepps, verkfræðistofunnar EFLU og Bremenports í Þýskalandi undir samstarfsyfirlýsingu vegna uppbyggingar stórskipahafnar í Finnafirði. Í þeirri samstarfsyfirlýsingu var kveðið á um hlutverk, skyldur og aðgerðir sem þessir aðilar voru ábyrgir fyrir. Í upphafi þessa árs gerði innviðaráðuneytið svo tveggja ára samning við Langanesbyggð vegna uppbyggingu innviðamála í 1

Langanesbyggð og ráðinn verkefnastjóri í það verkefni. Aðkoma og áhugi stjórnvalda skiptir sköpum og mikilvægt að þau séu áfram virkur þátttakandi í öllum undirbúningi. Næsta skref sveitarstjórnar er að óska eftir að sett verði af stað formleg undirbúningsvinna með aðkomu viðeigandi fagráðuneyta og stofnana.

« Til baka