Völsungur úr leik eftir tap gegn HK

HK vann fyrri leik liðanna 3-0 og nægði því sigur til að tryggja sig áfram í undanúrslit. Völsungur þurfti hinsvegar sigur til að knýja fram oddaleik.

HK var hinsvegar sterkari aðilinn í leiknum og fór með nokkuð öruggan 3-0 sigur 25-19, 25-11, 25-20). Þrátt fyrir jafna byrjun í fyrstu hrinu og góða þriðju hrinu þá náðu heimastúlkur ekki að veita HK næginlega mikla samkeppni í leiknum og fór HK nokkuð öruggt í gegnum leikinn. Völsungur gerði of mikið af mistökum bæði í sóknarleik og uppgjöfum og reyndist stöðugur leikur HK nóg til að tryggja sigur. HK spilaði jafnt og þétt í gegnum leikinn og gerðu mun færri mistök.

Bæði lið sýndu hörku góðan varnaleik á köflum en Völsungur náði oft á tíðum ekki að spila næginlega vel úr góðum vörnum liðsin. HK átti mun auðveldara með að byggja upp sóknir úr sínum vörnum og var það helsti munurinn á liðunum.

Stigahæst í leiknum í dag var Hjördís Eiríksdóttir leikmaður HK með 13 stig. Stigahæst í liði Völsungs var Arna Védís Bjarnadóttir með 7 stig.

HK er því komið í undanúrslit og mætir þar deildarmeisturum Þróttar Nes en undanúrslit hefjast 5.apríl.