Völsungur sigraði Þrótt R í Mizunodeildinn

Völsungur tók á móti Þrótti Reykjavík í Íþróttahöllinni á Húsavík í gærkveldi í Mizunodeild kvenna.

Blakfréttir.is segja svo frá leiknum:

Fyrsta hrina byrjaði af miklum krafti og var leikurinn nokkuð jafn. Liðin skiptust á stigum allt fram að stöðunni 18-15 fyrir Þrótti Reykjavík. 

Þá tók Völsungur sig til og skoraði 10 stig í röð og tryggði sér sigur í fyrstu hrinu 25-18. Sladjana Smiljanic fór hamförum í uppgjöf en hún skoraði 5 af síðustu 10 stigum Völsungs beint úr uppgjöf.

Völsungur hélt áfram sömu pressu í annari hrinu en hana vann Völsungur 25-14. Þróttur Reykjavík beit frá sér í þriðju hrinu með sigri 25-19 en þar var Sunna Þrastardóttir atkvæðamest í liði Þróttar með 7 stig. Völsungur reif sig svo aftur í gang í fjórðu hrinu og vann hana 25-17 og leikinn þar með 3-1.

Stigahæst í leiknum var Sladjana Smiljanic leikmaður Völsungs með 19 stig. Stigahæst í liði Þróttar var Sunna Þrastardóttir með 15 stig.

Völsungur er eftir leikinn í dag með 20 stig í 5.sæti deildarinnar. Þróttur Reykjavík er hinsvegar með 10 stig í 6.sæti deildarinnar.

Hingað og ekki lengra. Ágústa Tryggvadóttir og Þórunn Harðardóttir í hávörn.

Þjálfari Völsungs, Sladjana Smiljanic, var stigahæst í leiknum með 19 stig.

Arna Védís Bjarnadóttir smassar yfir netið.

Camilla Johansson og Jóna Björk Gunnarsdóttir.

Völsungar fagna sigri í leikslok.