Völsungssigur í fyrsta leik vetrarins

Völsungar fagna sigri.

Völsung­ur vann góðan sig­ur gegn Þrótti úr Fjarðabyggð í úr­vals­deild kvenna í blaki í 1. um­ferð deild­ar­inn­ar í kvöld.

Það var mikil eftirvænting meðal leikmanna og stuðningsmanna sem fjölmenntu í stúkuna.

Rúmlega 130 áhorfendur mættu til að styðja heimastúlkur en leikið var í PCC höllinni.

Fyrsta hrinan var jöfn framan af þar sem liðin skiptust á að skora og var jafnt allt fram að stöðunni 17-17. Þá tóku Völsungsstúlkur af skarið og komust í 21-17 og kláruðu svo hrinuna 25-20.

Í annarri hrinu byrjuðu heimastúlkur betur og komust í 4-1 og 13-7 og héldu öruggri forystu út hrinuna sem endaði 25-17.

Þriðja hrina var meira spennandi og jafnari þar sem Völsungur leiddi framan af en Þróttarstúlkur komust yfir í stöðunni 8-9 og héldu forystunni þar til heimastúlkur jöfnuðu í 16-16. Liðin skiptust á forystu og var jafnt í stöðunni 22-22 en eftir langt og spennandi rallý sem Völsungsstúlkur náðu að klára, settu heimakonur 3 síðustu stigin og unnu hrinuna 25-22 og leikinn þar með 3-0.

Stigahæstar í liði Völsungs voru þær Nikkia Benitez og Ana Rita Branco með 13 stig og í liði Þróttar var það Maria Jimenez Gallego með 9 stig.

Nýr þjálfari, Tihomir Paunovski, tók við Völsungsliðinu í haust en hann er ekki ókunnugur blakinu á Íslandi þar sem hann starfaði hjá Vestra og svo HK undanfarin ár.

Það er ljóst að Völsungsstúlkur eru ákveðnar í að ná langt á tímabilinu og hafa fengið reynslumeiri leikmenn til liðs við ungar og bráðefnilegar heimastúlkur og verður spennandi að fylgjast með þeim í vetur.

Það var vel mætt í höllina.

Með því að smella á myndirnar er hægt að fletta þeim og skoða í hærri upplausn.