Þakkir til margra

Gríðarleg gleði hefur grafið um sig eftir hrikalega vel hugsaða aðgerð embættismanna og hirðmanna hjá Húsavíkurbæ a la Norðurþingi. 

Flutningur allrar vinnu og kunnáttu sem og á tengslaneti við uppbyggingu ferðaþjónustu í héraðinu, til Akureyrar, er gæfuspor og mun örugglega borga sig hratt og örugglega.

Persónulega er ég þakklátur þeim, er tóku þessa djúphugsuðu ákvörðun. Nú þarf ég ekki að þvælast á fundi með geispandi embættismannagufum og síkveinandi ferðakverúlöntum. Þarf ekki að hlusta á grobb, kvart og sjálfsupphafningu forsvarsmanna hvalaskoðunarfyrirtækja. Er laus við að hafa samskipti við aðra í ferðaþjónustu eða reyna að finna eitthvað nýtt fyrir gesti og gangandi.

Auðvitað er miklu betra og léttara að hafa þetta allt inn á Akureyri. Þeir hafa Nonnasafn, Glerártorg og Rúmfatalagerinn til að laða að ferðamenn. Ekkert er að gera með náttúrupjatt austan Vaðlaheiðar. Veit ég að okkar mál eru í öruggum höndum Akureyringa og mun það auka veg okkar og virðingu í hvívetna. Þeir lofa okkur að nota KEA kortin í Samkaup. Takk fyrir það.

Kynning á einhverju demantsglingri eða dreifing fána með gleraugum sem áttu að tákna einhverja strandlengju er auðvitað bara hlægilegt fúsk austanheiðaraula. Nonnasafn hefur vinninginn.

Vonandi tekst þessum nýju meisturum ferðaþjónustunnar að koma öllu flugi að og frá landinu til Akureyrar og allt innanlandsflug verði með miðsetju á eyrinni akra. Já björt er framtíð vor og það eina sem skyggir á er að fyrrverandi stjóri Atvinnuþróunarfélagsins hér, hlaut ekki náð fyrir augum Akureyringa. Úr því verður að bæta. Sem fyrst. Hvílík lukka að við eigum svo ráðherra sem ætlar hvort eð er að loka þessu skrattans norðausturhorni til að sérviskufræðingar geti dundað þar í friði. Vel gert víkingar.

Með friði og spekt Sigurjón Benediktsson fyrrverandi ýmislegt.