Störfin eða deiliskipulagið – hvort er mikilvægara ?

Stefán Guðmundsson.

Kæru Húsvíkingar og nærsveita-menn – ég hef verulegar áhyggjur.

Eins og ykkur ætti flestum að vera kunnugt um þá höfum við hjá Gentle Giants Whale Watching rekið okkar starfssemi undanfarin 13 ár við góðan orðstír með nýsköpun, vöruþróun og fjölgun starfa á hverju ári frá upphafi.  Við eyðum árlega nálægt 15 og 20  milljónum í beinni markaðssetningu þegar allt er talið við það að draga ferðamenn til Húsavíkur. 

Samhliða hvalaskoðuninni og þeirri þjónustu hefur verið til staðar veitingarekstur sem er partur af þjónustu við okkar viðskiptavini; partur sem byrjaði smátt í einum litlum kofa og hefur vaxið og dafnað jafnt og þétt  á liðnum árum, öllum til hagsbóta.  Umræddir litlu kofar eða skúrar sem hafa verið notaðir í veitingareksturinn hafa staðið óáreittir á húsi Björgunarsveitarinnar frá upphafi, lengst af sem miðasala og  í seinni tíð sem veitingapartur.

Pallurinn

Pallurinn var stofnaður fyrir tveimur árum af Völundi Snæ og Þóru Sigurðardóttur konu hans, utan um þennan veitingarekstur og sló rækilega í gegn.  Áður höfðu Óli í GPG og Evelyn haldið utan um þennan rekstur í nokkur ár og Agnes Ýr Guðmundsdóttir þar á undan og frá upphafi.  Það sem kom okkur algerlega í opna skjöldu þegar Pallurinn hóf störf vorið 2012, var sú ánægjulega staðreynd að 96% viðskiptavina voru Húsvíkingar og aðrir Íslendingar sem tóku honum verulega fagnandi sem nýjum valmöguleika í að fara út að borða á sumrin með vinum og kunningjum, fyrir ásættanlegt verð og góða stemmningu.

Þúsundir Íslendinga komu til Húsavíkur á þessum síðustu tveimur árum – gagngert til þess að snæða á Pallinum.  Mikið var lagt til í tilkostnað og markaðssetningu til þess að draga sem flesta til Húsavíkur.  Flestir þeirra Íslendinga sem komu til bæjarins í þessum tilgangi, fóru einnig á aðra veitingastaði í leiðinni og nýttu sér fjölbreytilega þjónustu sem í boði var.  Keðjuverkandi áhrif urðu mikil. 

Björgunarsveitin hefur sömuleiðis notið þessarar starfssemi í gegn um Gentle Giants vegna tekna af þakinu í formi leigugreiðslna fyrir miðasölu GG og umrædd smáhýsi veitinga.

Upprunalegir skúrar

Nú ber svo við að svokallað „miðhafnardeiliskipulag“ hefur verið samþykkt og það var alltaf í okkar plönum að nýtt veitingahús myndi rísa fyrir neðan bakkann á okkar lóð, svokallaðri skúralóð að Hafnarstétt 5 og taka við af starfssemi Pallsins.  Það hefur óhjákvæmilega dregist vegna margra ástæðna – slík bygging þarf lengri meðgöngu í undirbúningi.  En þess ber sérstaklega að geta að umrætt deiliskipulag var klárað fyrir u.þ.b. einu og hálfu ári  með breytingum sem við lögðum til vegna umrædds byggingareits.  

Samhliða var óskað eftir staðsetningu fyrir þá 3 skúra sem á lóðinni standa og eru í raun síðustu gömlu skúrarnir á hafnarsvæðinu sem enn standa í upprunalegri mynd.  Staðurinn sem óskað var eftir, var nálægt skábrautinni umtöluðu – og hugmyndin að gera skúrana upp og setja þá á staura út í höfnina og prýða þannig ímynd svæðisins enn frekar svo sómi væri að.  Á þetta var ekki fallist og hefur það valdið okkur nokkrum vandræðum og töfum í umræddu ferli. 

En skúrarnir umræddu eru í fullri notkun fyrir þá starfssemi sem við starfrækjum.  Þeir verða væntanlega ekki hengdir upp í loft á meðan byggingafrakvæmdir fara fram á umræddri lóð.

Tíu störf lögð niður með boðvaldi

Það blasir því við samkvæmt núverandi ákvörðun bæjaryfirvalda og þar með talið ákvörðun Skipulags og bygginganefndar,  að Pallurinn verði lagður niður fyrir 1. júní næstkomandi – þrátt fyrir ítrekaðar óskir okkar um að fá lengri aðlögunartíma, eða þar til nýtt veitingahús verður risið fyrir neðan bakkann. Þar með verði gætt meðalhófs og skaðinn verði lágmarkaður.   Gangi það ekki eftir eru ca. 10 störf í húfi, skert þjónusta GG við sína viðskiptavini sem og skertir valmöguleikar og þjónusta við alla Húsvíkinga, nærsveitamenn og Íslendinga.  Þá er um leið höggvið stórt skarð í okkar starfssemi.

Það er skrítin staða að horfa uppá 10 störf lögð niður með boðvaldi og samþykki bæjaryfirvalda, í starfssemi sem hófst fyrir 13 árum síðan – vegna þess að hún telst ekki með samkvæmt nýju deiliskipulagi. Það vita þeir sem vilja að öll skipulög sem hönnuð eru – þau eru ekki meitluð í stein til næstu 100 ára og eiga ekki að vera meitluð í stein, þau eiga að taka reglulegum breytingum eftir aðstæðum og þörfum á hverjum tíma.  Þau þurfa aðlögun og mismikla aðlögun.  Grunn prinsipp allra slíkra deiliskipulaga er að skaða EKKI þá starfssemi sem fyrir er.    Það er um leið skelfilegt að horfa uppá uppsagnir 60 starfa hjá Vísi.  

Hjáseturnar iðrast

Kæru Húsvíkingar og nærsveitamenn.  Staðan er þessi í dag.  Ferðamannatímabilið er handan við hornið.  Það hefur reynst okkur árangurslítið að tala um fyrir kjörnum fulltrúum.  Þó ber þess sérstaklega að geta að margir þeirra telja að endurskoða þurfi þessa ákvörðun, ekki síst í ljósi nýjustu tíðinda frá Vísi um lokun þeirrar starfssemi og þá hörmung að nálægt 60 manns hefur verið sagt upp. 

Í því sambandi ber að nefna þá staðreynd að Friðrik Sigurðsson flutti um það tillögu á síðasta bæjarstjórnarfundi að Pallurinn fengi að starfa a.m.k. þetta sumar 2014, eða þar til annað kæmi í ljós.  Sú tillaga var kolfelld af fjórum fulltrúum í bæjarstjórn og aðrir sátu hjá.  Hjáseturnar flestar, iðrast gjörða sinna í dag og er það vel.  Þær munu fá annað tækifæri ef þær vilja.

Það rímar ekki alveg við störf og skyldur bæjarfulltrúa, sem gefa sig út fyrir það að leita nýrra starfa í hvívetna fyrir sveitarfélagið, að þeir vilji hafa forgöngu um að leggja niður 10 störf á Pallinum, en titri svo af áhyggjum og bræði yfir uppsögnum Vísis.    Bæjarfulltrúum og fulltrúum í nefndum bæjarins ber ríkuleg skylda til þess að ríghalda í öll þau störf sem verða til á hverjum tíma og beita til þess öllum mögulegum ráðum og afbrigðum sem þeir hafa.

Þeir sem hafa borið fyrir sig umrætt deiliskipulagi og standa því næst – hafa haft á orði að þeir verði að fara eftir deiliskipulaginu svokallaða.   Ég hef spurt á móti hvort væri mikilvægara í þeirra augum, eitthvert glænýtt deiliskipulag eða tímabundið afbrigði til aðlögunar fyrir 10 störf sem gætu lagst af?  Það verður fátt um svör.  

Að sama skapi hef ég spurt hvort kjörnir fulltrúar myndu standa uppi á stól og veifa einhverju deiliskipulagi ef öflugur jarðskjálfti yrði á svæðinu, líkt og samlíking við uppsagnir hjá Vísi.   Hvort það yrði virkilega raunin, þegar aðstæður breytast skyndilega og meiri aðlögunar er þörf, eins og í okkar tilviki með Pallinn.

Verum öll í sama uppbyggingarliðinu

Kæru Húsvíkingar og nærsveitamenn.

Ég  skora hér með á Skipulags & bygginganefnd, sem og kjörna bæjarfulltrúa að endurskoða þá ákvörðun sína að leggja Pallinn niður með þeim 10 störfum sem þar eru, ásamt því að höggva grimmilega í okkar starfssemi með aflagningu veitingastarfsseminnar.   Nefndir og ráð voru boðuð til funda í skyndi þegar uppsagnir Vísisi voru kynntar – það er einnig hægt að gera í þessu tilviki og full þörf á slíku – ekki síst vegna þeirrar staðreyndar að undirbúningur þarf að geta átt sér stað án tafar af okkar hálfu.

Ég leyfi mér um leið að skora á ykkur að  halda umræðunni vakandi og lýsa skoðunum ykkar á þessari ráðstöfun.  Hvetja nefndarmenn og aðra kjörna fulltrúa til góðra verka í þessu  sambandi.  Ef ákvörðunin  gengur endanlega eftir,  þá hafið þið færri möguleika til þess að fara út að borða en verið hefur á undanförnum sumrum, þjónustan og lífsgæðin rýrna í bænum og störfum fækkar.

Við eigum öll að vera í sama liði þegar kemur að uppbyggingu á þjónustu í bænum, sköpun starfa os.frv.  Þar sem flóran er fjölbreytilegri – þangað vill fólk koma.  Ef það heppnast ekki að verja það sem fyrir er, þá er voðinn vís eins og sagan kennir okkur með Fiskiðjusamlag Húsvíkur og fleira.   Við erum ekki á förum með okkar starfssemi; það liggur í augum uppi, en viljum umfram allt fá það svigrúm sem þarf til þess að halda áframhaldandi uppbyggingu.  Við höfnum því að bæjaryfirvöld höggvi grimmilega í okkar starfssemi og skerði með boðvaldi þá þjónustu og störf sem eru til staðar og hafa verið byggð upp markvisst undanfarin ár.

Staðreyndirnar blasa við á þessum tímapunkti – hvort eigum við að verja störfin eða eina málsgrein í nýju deiliskipulagi ?

Virðingarfyllst  fh. Pallsins og GG,

Stefán Guðmundsson  framkvæmdastjóri.