Mikill gleðidagur sagði Villi Páls

Villi Páls ræsir hér lyftuna á nýjum stað.

"Ég vil segja það að þetta er mikill gleðidagur í sveitarfélaginu fyrir fjölskyldur og börnin.

Þessi lyfta er einmitt tilætluð fjölskyldu- og barnafólki. Nú er mér ætlað að ýta á takka, það er minna verk en að snúa gömlu díselvélinni í gang fyrir fyrstu kaðallyftuna sem við settum í Melinn.

Síðan kom spjaldalyfta frá Skíðasambandinu þar sem spjöld voru sett á vírinn, einhverjir muna eftir því og sett aftur fyrir bak og svo var brunað upp. Síðan kom Doppelmayr lyfta í Stallana og svo Doppelmayr lyfta í Melinn.

Þetta er byrjunin hérna á þessu fjölbreytta útivistarsvæði, hér á að vera allt mögulegt. Þið sjáið hvar lyftan endar og þið sjáið líka að það er hátt upp í toppinn. Til hamingju með daginn". Sagði Vilhjálmur Pálsson í morgun þegar hann ræsti lyftuna sem flutt var úr Skálamel á nýtt útivistarsvæði Húsvíkinga í Reyðarárhnjúk.

Þar með var nýja skíðasvæðið formlega tekið í notkun en á undanförnum vikum og mánuðum hefur verið unnið sleitulaust að uppsetningu skíðalyftunnar í Reyðarárhnjúk.

Garðar Héðinsson og Böðvar Bjarnason hafa haldið utan um það verkefni af mikilli prýði. Þeir hafa unnið í þágu samfélagsins og verkstýrt framkvæmdinni í samráði við fjölda velviljaðra fyrirtækja, einstaklinga og starfsmenn Norðurþings.

Kristján Þór Magnússon sveitarstjóri Norðurþings færði Garðari og Böðvari þakklætisvott frá sveitarfélaginu fyrir drifkraft þeirra og dugnað við framkvæmdina.

Vihjálmur Pálsson ræsti lyftuna og naut við það aðstoðar Páls Ríkarðssonar starfsmann skíðasvæða Norðurþings.

Böðvar Bjarnason var fyrstur til að fara í lyftuna og Garðar Héðinsson fylgdi fast á hæla hans.

Utan á lyftuskúrnum, sem kom einnig úr Skálamel, hefur verið hengdur upp skjöldur með nöfnum þeirra helstu fyrirtækja sem lögðu umtalsvert til flutnings lyftunnar.

Á heimasíðu Norðurþings er eftirtöldum fyrirtækjum þakkað fyrir stuðning við verkið og ómetanlegt framlag þeirra til að gera þetta að veruleika.

• Trésmiðjan Rein ehf
• Steinsteypir ehf
• Víkurraf ehf
• Hóll ehf
• Grímur vélsmiðja ehf
• Ístrukkur ehf
• Vélsmiðjan Ásverk ehf
• Bláfjall ehf
• Ísfell
• Landsvirkjun
• PCC Bakkisilicon Hf
• Mannvit