Húsavíkurstofa lokar, hvað svo ?

Á heimasíðu Húsavíkurstofu má finna eftirfarandi:

"Húsavíkurstofa er miðstöð fyrir hagsmunaraðila í verslun og þjónustu á svæðinu. Þar er veitt þjónusta á sviði markaðs- og kynningarmála fyrir Húsavík ásamt verkefna- og viðburðarstjórnun.

Markmið Húsavíkurstofu er að verða samnefnari fyrirtækja á svæðinu og stuðla að eflingu atvinnulífs með aukinni samvinnu hagsmunaaðila og auknum tækifærum. Einnig að gera Húsavík að eftirsóttum áfangastað með fjölbreyttri afþreyingu og þjónustu allan ársins hring, lengja dvalartíma ferðamanna og stuðla að hámarks virðisauka hagsmunaaðila af ferðaþjónustu.

Um 32 aðailar eru skráðir að Húsavíkurstofu, þ.á.m. eitt fyrirtæki frá Akureyri. Mér finnst það frekar léleg þátttaka og hefði viljað sjá helmingi fleiri fyrirtæki sem aðila að stofunni, það mætti hugsa sér að þau greiddu fé til stofunnar í einhverju hlutfalli við veltu".

Nú er vor og árið 2016, áætlað er að til landsins komi 1700 þúsund ferðamenn, æ fleiri koma utan háannar þ.e. haust, vetur og vor. Landshlutar og sveitarfélög leitast við að ná einhverju af þessari köku. Á Húsavík hafa aldrei í sögunni verið eins góðir og miklir möguleikar í móttöku ferðamanna.

Nýtt hótel, nýir veitinagstaðir.

Nýtt glæsilegt Fosshótel opnar í maí einnig opna þrír nýjir veitingastaðir, gistimöguleikar hafa aldrei verið fleiri eða betri, ný fyrirtæki í afþreyingu hafa litið dagsins ljós, bæði að sumri sem vetri.

Flugsamgöngur.

Flugsamgöngur hafa aldrei verið betri. 20 flug á viku milli Húsavíkur og Reykjavíkur. Vegna framkvæmda á Bakka, Húsavíkurhöfðajarðganga og á Þeistareykjum er talið að hér verði um 700 manns á þeirra vegum um næstu áramót.

Verðugt verkefni.

Það væri verðugt verkefni fyrir Norðurþing að leiða saman fyrirtæki sem vildu styðja endurreisn Húsavíkurstofu. Það er varla til það fyrirtæki í Norðurþingi ( Norðuþing nær til Kelduhverfis, Kópaskers og Raufarhafnar, ekki gleyma því) sem og önnur fyrirtæki Þingeyjarsýslu sem ekki koma beint að þjónustu við ferðamenn á einn eða annan hátt, t.d. iðnaðarmenn, bændur, bakarí, bíla og hjólbarðaverkstæði, verslanir, bankar og tryggingafélög svo eitthvað sé nefnt.

Ráðstefnur og viðburðir.

Hið nýja Fosshótel verður að einhverju leyti auglýst sem ráðstefnuhótel með mörgum fundarsölum, stór ráðstefna gæti kallað á Íþróttahöllina undir viðburð, þar fengi Norðuþing tekjur t.d. Ráðstefnur eru yfirleitt haldnar utan háannar. Í kringum ráðstefnur og fundi eru yfirleitt stór hópur maka eða aðstandenda sem þarf á afþreyingu að halda svo þar eru líka tækifæri. Loksins er hafnaraðstaða orðin það góð að hægt er að taka á móti stórum og smáum skemmtiferðaskipum. Markaðssetning fyrir móttöku slíkra skipa tekur lengri tíma en markaðsetning í annari ferðaþjónustu.

Orkugangan er dæmi um viðburð sem gæti verið alþjóðlegur þar með kæmu hér erlendir gestir utan háannar sem nýttu sér þjónustu í gistingu og veitingastaðaflórunni, eða þyrluskíðaferðir, nú er vísir að skíðaferðum og siglingum hjá einu hvalakoðunarfyrirtæki hér, bara svo eitthvað sé nefnt. Í Þingeyjarsýslu eru margir helstu og vinsælustu ferðamanna staðir landsins en það eru fleiri sem bjóða uppá náttúruperlur, því er samkeppnin mikil.

Hver mun ?

Hver mun sjá að dreifa fjórðungskorti að Norðulandi eystra á alla þjónustustaði fyrir ferðafólk ? Þessi kort sem eru blöð í blokk sem hver og einn getur tekið með sér. Þau var varla að finna hér um slóðir í fyrra, hvorki á flugvelli eða annarsstaðar. Verður gefið út þjónustukort fyrir Húsavík ? Verða merktar gönguleiðir á Húsavík ? t.d. út að Húsavíkurvita, Botnsvatni ofl. staði. Mun verða sett upp almenningsalerni á Húsavík ? Verður upplýsingamiðstöð fyrir ferðamenn starfrækt ? 

Greina þarf þá ferðamenn sem landsins koma, hverjar eru þeirra þarfir og langanir, öðruvísi er ekki hægt að þróa ferðaþjónustu á svæðinu, nema eftirá og þá er það kannski of seint.

Nú ætti að nota þann meðbyr og slagkraft í stærsta atvinnuvegi þjóðarinnar, ferðaþjónustu, og halda áfram markaðs og upplýsingastarfsemi. Sækja fjármagn til hins opinbera til að efla og bæta ferðaþjónustu á staðnum.
Markaðs og kynningarmál eru eilífðarmál og má hvergi slá af né hika.

Hörður Jónasson