Fyrsta deildartap Völsungs á heimavelli í sumar

27. ágú

Fyrsta deildartap Völsungs á heimavelli í sumar
Íþróttir - - Lestrar 662

Guðmundur Óli skorar úr vítaspyrnu gegn Gróttu.

Völsungur tók á móti Gróttu í enn einum toppslagnum í 2.deild karla síðastliðinn laugardag.

Með sigri gátu heimamenn komist upp fyrir Gróttu og því til mikils að vinna.

Bjarki Baldvinsson var í banni hjá heimamönnum sem virtust sakna hans, en gestirnir byrjuðu leikinn töluvert betur.

Þegar manni fannst Völsungar vera að komast inn í leikinn spiluðu Gróttumenn snarpa skyndisókn sem endaði með marki Axels Harðarsonar á 38.mínútu. 0-1.

Annað reiðarslag kom rétt fyrir hálfleikinn, en Valtýr Michaelsson skoraði laglegt mark eftir heldur auðvelt uppspil gestanna á 43.mínútu. 0-2 fyrir Gróttu og stóðu leikar þannig í hálfleik.

Það var annað að sjá til Völsungsliðsins í seinni hálfleik en þeir þrýstu Gróttuliðinu aftar á völlinn. Ásgeir Kristjánsson fékk vítaspyrnu á 53.mínútu sem Guðmundur Óli Steingrímsson skoraði úr. 1-2 og nægur tími eftir til að jafna.

Völsungar sóttu stíft og mátti heyra trúnna í brekkunni með að jöfnunarmark væri á leiðinni. Broddur fór þó úr sóknarleik heimamanna þegar Ásgeir þurfti að yfirgefa völlinn vegna meiðsla og gestirnir bættu við mjög svo laglegu marki á 75.mínútu. Þar var Pétur Árnason að verki. 1-3.

Aðalsteinn Jóhann Friðriksson minnkaði svo muninn á 89.mínútu og þrátt fyrir þunga pressu síðustu mínúturnar komust Völsungar ekki nær. 2-3 tap staðreynd en þetta var fyrsta deildartap Völsungs á Húsavíkurvelli í sumar.

Það þarf mikið að ganga upp til þess að liðið geri tilkall til sætis í Inkasso deildinni að ári. Fyrst og fremst þurfa Völsungar að vinna sína leiki og vona svo hið besta. Völsungur er nú í 5. sæti með 31 stig þegar fjórar umferðir eru eftir. IBG

Hér koma myndir sem ljósmyndari 640.is tók á leiknum og með því að smella á þær er hægt að fletta þeim og skoða í stærri upplausn.