Af fullum þunga - Með góðu eða illu

Þann 30. apríl s.l. sendi Hafnastjóri bréf til útgerðaraðila á Húsavík og óskaði eftir því að gámar undir Beinabakka austan tollvörugirðingar yrðu fjarlægðir vegna fyrirhugaðra vegaframkvæmda frá höfða og niður á hafnarsvæðið. 

Ef ekki yrði orðið við beiðninni er tilkynnt um að gámar verði fjarlægðir á kostnað eiganda. Frestur var gefinn til 1. júní n.k. Ný staðsetning var boðin á nýtt geymslusvæði suður í gryfju í Haukamýri sem er eins langt frá starfssvæði útgerðanna og kostur er.

Umrædd gryfja er illfær meira og minna allan veturinn og drullusvað á vorin.

Útgerðaraðilar hafa nýtt þessa gáma undir veiðarfæri og annan búnað tengt rekstri sínum og skiljanlega mikilvægt að staðsetning þeirra sé eins nærri starfsvettvangi og kostur er.

Það hefur verið sjálfsagt að bregðast við aðstæðum til bráðabirgða þegar framkvæmdir standa yfir tímabundið en það er með öllu óskiljanlegt að hafnastjóri og hafnastjórn ætli útgerðaraðilum að nýta gámasvæði suður af Haukamýri til frambúðar undir geymslu á veiðarfærum og búnaði sem er nánast í daglegri notkun. Ekki liggur fyrir að fara í fyrirhugaðar vegaframkvæmdir í bráð og því er þessi ákvörðun enn furðurlegri, nema það sé eindreginn vilji að koma útgerðum endanlega í burtu. Sem í raun virðist stefnt að leynt og ljóst. Koma þeim aðilum í burtu sem hafa byggt upp stoðir samfélagsins áratugum saman.

Sömu aðilar og tóku þessa ákvörðun á hendur útgerðarmannanna eru þessa dagana að kynna stefnumál sín fyrir komandi kosningar, en þar eru á ferðinni innihaldslaus loforð á loforð ofan um bjartari tíma og aukin samskipti við atvinnulífið og einstaklinga. Fögru fyrirheitin virðast standa stutt þessa dagana.

Það hefur legið fyrir í langan tíma að ásættanlega lausn að geymslusvæði þyrfti að finna til framtíðar fyrir útgerðarmennina við hafnarsvæðið. Taka samtalið við hagmunaaðila. Það hefur ekki verið gert og virðist ekki standa til samkvæmt hótunarbréfinu frá hafnarstjóranum í Haukamýri. 

Við undirritaðir gerum skýlausa og harða kröfu um að nýr meirihluti að loknum kosningum taki þessa gerræðislegu ákvörðun tafarkaust til baka og finni ásættanlegar leiðir í málinu með okkur við fyrsta tækifæri.

Útgerðarmenn Húsavíkur.

Hafnarstjóra mun berast bréf von bráðar þar sem þessir sömu aðilar (og skrifuðu þessa grein) eru búnir að skrifa undir yfirlýsingu til hans, þar sem þeir mótmæla fyrirhuguðum flutningi suður í Haukamýri og hafna henni.