Vond vinnubrögð

Fyrir skömmu sagði Norðurþing starfsfólki á leikskólanum Grænuvöllum upp neysluhlés-greiðslum.  

Á fundi bæjarráðs Húsavíkurkaup-staðar þann 23. mars árið 2000 var eftirfarandi samþykkt: „Starfsfólk á leikskólum Húsavíkur sem matast inn á deildum með börnum í hádeginu fái greiddar 11 klst. í yfirvinnu á mánuði‟ samhliða föstum mánaðarlegum launagreiðslum. Málið á sér lengri sögu en það.

Miðað var við að matast sé með nemendum alla virka daga. Greiðslurnar eru viðbót við kjarasamningsbundnar greiðslur og því um sérkjör á leikskólanum Grænuvöllum að ræða. Það gilti ekki um starfsfólk á öðrum leikskólum, heimaþjónustu eða starfsstéttum í grunnskólum. Starfsfólk Grænuvalla hafa fengið þessar greiðslur óháð starfshlutfalli.

Allir sammála um að endurskoða þessar greiðslur

Þessu ákvæði var komið á í mörgum sveitarfélögum enda starfsfólk að selja eigin neysluhlé til að sinna þjónustu við nemendur eða einhvers konar kaup kaups. Á undanförnum hefur starfið þróast og fær starfsfólk nú neysluhlé auk þess að matast með nemendum.

Við fjárhagsáætlunargerð sveitarfélagsins undanfarin ár hefur lengi vofað yfir að draga þessar greiðslur til baka. Auk þess er unnið að því að hætta öllum aukagreiðslum eða óútskýrðum greiðslum hjá sveitarfélaginu; aksturstyrkjum, fastri yfirvinnu, bakvöktum æðstu stjórnenda o.fl.

Það eru liðin 20 ár og sannarlega ástæða til að endurskoða umrædda samþykkt. Það er ljóst að þeirri aðferðarfræði sem var beitt við uppsögn þessara greiðslna hefur hleypt illu blóði í starfsfólk Grænuvalla. Það er miður. Í lok septembermánaðar var starfsfólki Grænuvalla tilkynnt um uppsögn á neysluhlésgreiðslunum sem felur í sér skerðingu á kjörum og stór biti að kyngja og því mikilvægt að vanda til verka þegar ákvæðið er endurskoðað.

Önnur sveitarfélög

Mörg sveitarfélög, s.s. Ölfus, Mosfellsbær og Seltjarnarnes ákvaðu að greiða sérstakar greiðslur til handa þeim sem eru á lægstu launum í leikskólum og í heimaþjónustu þegar umræddar neysluhlésgreiðslur voru felldar út. Þar er greiðslan föst fjárhæð miðað við starfshlutfall og tekur ekki hækkunum á samningstíma um greiðsluna. Með þessu er tryggð hækkun lægstu launa hefðbundinna kvennastétta.

Í Norðurþingi undirritar sveitarstjóri bréf til starfsfólks þar sem þessu er einhliða sagt upp. Það er lítil reisn yfir þeim vinnubrögðum. Það hefði verið nær að hefja endurskoðun á launauppbyggingu í sveitarfélaginu með því að byrja á toppnum. Það er hinsvegar óheppilegt að draga kjörna fulltrúa beint inn í umræðu um kjaramál en það hefur verið gert.

Næstu skref er að skoða kjör þeirra sem lægstu launin hafa á Grænuvöllum og annarsstaðar í sveitarfélaginu í samstarfi við stéttarfélög starfsfólks. Það hafa önnur sveitarfélög gert; unnið heimavinnuna sína og til fyrirmyndar þegar neysluhlésgreiðslurnar hafa verið dregnar til baka. Við verðum að vanda okkur betur, upplýsa fólk og vinna saman til að komast niðurstöðu.

Hjálmar Bogi Hafliðason

Sveitarstjórnarfulltrúi