Völsungur vann botnbaráttuslaginn

Völsungur tók í dag á móti Þrótti R í botnbaráttuslag úrvalsdeildar kvenna í blaki. 

Völsungur var fyrir leikinn í næst neðsta sæti með fimm stig en Þróttur á botninum með tvö stig. Það var til mikils að vinna fyrir bæði lið.

Fyrsta hrina fór jafnt af stað og var jafnt á öllum tölum en þegar á leið virtust Völsungar ná tökum á hrinunni og í stöðinni 15-12 taka Þróttara leikhlé. En það dugði ekki til og Völsungur hélt forystunni út hrinuna og unnu 25-20 og þar munaði mestu um góða vörn Völsunga.

Í annari hrinu byrjaði Þróttur betur og komust í 1-3 og 3-7 og Völsungar taka leikhlé í stöðinni 8-11 í von um að komast á rétta braut. Þróttarar virtust ekki vera á sama máli og náðu algjöru tangarhaldi á Völsungstelpum og unnu hrinuna örugglega 13-25.

Í þriðju hrinu byrjuðu Völsungar betur en Þróttarar héngu í þeim staðráðnar að fylgja eftir ákefðinni í 2. hrinu. Völsungar leiddu og í stöðunni 17-14 tók Tomi þjálfari þeirra leikhlé þar sem gestirnir voru farnar að narta í hælana á þeim.

Það var helst samskiptaleysi liðsins sem varð til þess að Þróttur var farinn að hleypa spennu í hrinunna. Eftir leikhléð tók við spennandi endasprettur þar sem Völsungar náðu að landa hrinunni 25-22 með fallegu smassi Ky Hunt beint í gólf.

Í byrjun fjórðu hrinu þar sem Þróttur setti fyrstu uppgjöf í net var eins og Völsungsstelpurnar áttuðu sig á því að þetta væri hægt og með dyggum stuðningi úr stúkunni stungu þær gestina af. Þrátt fyrir tvö leikhlé gestanna í stöðunni 8-2 og aftur í 16-4 virtist sem trú þeirra á verkefninu væri farin og Völsungur vann 25-12 og leikinn þar með 3-1.

Vissulega munaði mikið um að í lið Þróttar vantaði tvær af þremur stigahæstu leikmönnum liðsins, þær Eldey Hrafnsdóttur og Nicole Johansen.

Með sigrinum náðu Völsungar að slíta sig aðeins frá Þrótti sem sitja sem fyrr á botninum með tvö stig.  Völsungur enn í næstneðsta sæti en nú með í 8 stig. Þær þurfa fimm stig til að ná Álftanesi sem er sæti ofar en reyndar með leik til góða.

Stigahæst í lið Völsunga var Ky Hunt með 24 sitig en í liði Þróttar Reykjavík var Arna Védís Bjarnadóttir með 9 stig.

Völsungar verjast.

Ky Hunt var stigahæst Völsunga.

Katla María Guðnadóttir kom inn á í lokin í stað Tami Kaposi.

Sigri fagnað í leikslok.

Völsungsliðið að loknum leik.

Það var systraslagur í dag en Sigrún Anna og Arna Védís Bjarnadætur léku með sitt hvoru liðinu. Iðunn systir þeirra sem leikur með Þrótti líkt og Arna Védís var hins vegar fjarri góðu gamni. Arna Védís var stigahæst Þróttara með níu stig.