Völsungur tapaði fyrir Stjörnunni í Mizunodeild kvenna

Sladjana Smiljanic var stigahæst Völsunga.

Stjarnan og Völsungur mættust í Mizunodeild kvenna sl. föstudags-kvöld en leikið var á Álftanesi.

Stjarnan er í baráttu á meðal efstu þriggja liða í deildinni á meðan Völsungur er í baráttu á meðal þriggja neðstu liða deildarinnar. Það var því bústið við þæginlegum sigri Stjörnunar en þó ekkert öruggt.

Völsungur hafði fyrr á tímabilinu náð sigri gegn Aftureldingu og þá var Stjarnan án Rosilyn Ray Cummings sem gat ekki spilað í dag sökum þess að hún var ekki með gilt landvistarleyfi og er því farin heim til Bandaríkjana.

Leikurinn var nokkuð jafn og spennandi og áttu bæði lið góða kafla. Fyrstu tvær hrinur leiksins voru hvað mest jafnar en hafði Stjarnan þó betur á endandum í báðum hrinum og sigraði þær 25-22 og 25-20.

Stjarnan hafði mikla yfirburði í þriðju hrinu og var munurinn mestur í stöðunni 17-6. Völsungur átti hinsvegar góða endurkomu í þriðju hrinu og minnkuðu muninn niður í 23-18. Það reyndist hinsvegar of seint og sigraði Stjarnan þriðju hrinu 25-19.

Stigahæst í leiknum var Sladjana Smiljanic leikmaður Völsungs með 16 stig. Næst á eftir henni kom Erla Rán Eiríksdóttir leikmaður Stjörnunnar með 15 stig. (blakfrettir.is)