Völsungur í vanda

Í 90 ár hefur Völsungur lifað í samfélaginu okkar hér á Húsavík. 

Það er ljóst að félag eins og Völsungur sækir mátt sinn í samfélagið okkar og um leið nærist samfélagið á öflugu íþrótta- og æskulýðsstarfi sem unnið er í Völsungi.  En þetta gerist ekki af sjálfu sér.  Við sem búum hér á Húsavík höfum það í hendi okkar hvernig til tekst.  Á þessum 90 árum hefur samfélagið okkar þróast gríðarlega.  Félagshyggjan hefur vikið fyrir einstaklingshyggjunni.  Það gerir félagi eins og Völsungi erfitt um vik að vaxa og dafna í takt við kröfur samfélagsins um bætta þjónustu við börn og unglinga. 

Starfsemi félagsins hefur samt vaxið og dafnað undanfarin ár, þökk sé dugnaði fólksins sem sinnir sjálfboðastarfi fyrir félagið og aðhaldssömum rekstri.  Innan Völsungs starfa sjö deildir og eru íþróttaiðkendur um 500 talsins á aldrinum fjögurra ára til sextugs.  Helstu áherslur félagsins hafa verið að bjóða fjölbreytt úrval íþróttaæfinga fyrir börn og unglinga í öruggu umhverfi undir handleiðslu vel menntaðra þjálfara.  Það má öllum ljóst vera að slíkur metnaður í starfi félagsins kostar fjármuni.  Að auki hefur aðstaða til íþróttaiðkunar batnað til mikilla muna með tilkomu gervigrasvallar og vallarhúss.  Rekstur vallasvæðisins hefur verið í höndum Völsungs frá árinu 2014 og skapast hafa tvö heilsársstörf innan félagsins vegna aukinnar notkunar á völlunum, umhirðu og viðhalds vallarhúss og fleiri verkefna sem eru afleiðing af bættri aðstöðu til íþróttaiðkunar.  Í því samhengi má ekki gleyma þeim fjölda almennings sem nýtir sér þessa góðu aðstöðu og gengur eða skokkar á upphituðum gervigrasvellinum.  Það má velta fyrir sér þeim fjárhagslega ávinningi sem sveitarfélagið nær þar fram í bættri heilsu íbúa á Húsavík þótt erfitt sé að nefna ákveðnar upphæðir í þeim efnum.  Það eru samt ekki tölur sem koma fram á útgjaldahliðinni í fjárhagsáætlunum sveitarfélagsins.

Þrátt fyrir að Völsungur hafi sýnt metnað í að mæta auknum kröfum um meiri fagmennsku í starfi sínu með börn og unglinga hér á Húsavík og í nágrenni, þá hafa fjárframlög frá sveitarfélaginu Norðurþingi lækkað að raungildi undanfarin ár þar sem þau hafa ekki tekið mið af almennri verðlags- og launaþróun.

Nú eru kosningar framundan og það er óskandi að flokkarnir setji íþrótta- og æskulýðsmálin á oddinn. Framlag Norðurþings til íþrótta- og æskulýðsmála sem hlutfall af heildargjöldum árið 2016 var 8,33%. Þetta sama hlutfall var 12,43% hjá Akureyrarbæ, 11,94% í Snæfellsbæ og 14,12% í Fjarðabyggð svo eitthvað sé nefnt.  Vonandi munu framlög Norðurþings aukast á komandi árum í takt við aukin gæði í íþróttastarfinu. (Hér fara hagsmunir Völsungs og Norðurþings saman).

Eins og önnur frjáls félagasamtök reiðir Völsungur sig á tekjur af félagsgjöldum félagsmanna.  Aðalstjórn sendir út greiðsluseðla að upphæð kr. 3.000 einu sinni á ári í formi valgreiðslu í heimabanka félagsmanna.  Þessar tekjur eru gríðarlega mikilvægar fyrir starfsemina og þökkum við öllum þeim sem hafa lagt félaginu lið með því að greiða þetta árgjald.  Félagið er öllum opið og auðvelt er að gerast félagi með því að senda nafn, kennitölu, símanúmer og netfang á netfangið volsungur@volsungur.is.

Auk framlags frá Norðurþingi, innheimtu félagsgjalda og lottótekjum, koma tekjur til félagsins með innheimtu æfingagjalda.  Þessum tekjum er ætlað að mæta hluta af rekstrarkostnaði deildanna s.s. launakostnaði þjálfara og ferðakostnaðar á mót eða einstaka leiki.

Fjórða tekjulind félagsins er svo styrkir frá fyrirtækjum og einstaklingum.  Nú þegar starf félagsins hefur vaxið stöðugt undanfarin ár þá er ljóst að þessi tekjulind verður á sama tíma hlutfallslega sífellt minni.

Völsungur er með fimm einstaklinga á launum á ársgrundvelli auk fjölda hlutastarfa, með ársveltu upp á 78 milljónir.  Þetta eru störf sem munar um í okkar samfélagi og skila tekjum til baka til sveitarfélagsins.

Nú er sú staða komin upp hjá Völsungi að vegna erfiðleika í rekstri félagsins, eru sífellt færri tilbúnir að vinna sjálfboðaliðastarf innan þess.  Mest allur tími sjálfboðaliða og starfsmanna fer í að reyna að afla fjár til rekstrains í stað þess að geta með öflugri hætti sinnt grasrótarstarfinu.

Við biðlum því til fulltrúa framboða til kjörs í sveitarstjórn Norðurþings um að skoða heildarmyndina og gera Völsungi fjárhagslega mögulegt að sinna áfram metnaðarfullu starfi í þágu barna, ungmenna og almennings hér í sveitarfélaginu.

En þetta er ekki bara ákall til kjörinna fulltrúa!  Þetta er líka ákall til allra Völsunga að koma og leggja félaginu til krafta ykkar!

Því miður eru margir sem telja  það vera nóg að borga æfingagjöldin fyrir íþróttaiðkun barna sinna, þá sé þeirra hlutverki lokið og þjálfarar eða stjórnarfólk sjái um rest.  Afleiðingin er sú að alltof fáar hendur vinna alltof mörg verk til þess að láta dæmið ganga upp.  Önnur afleiðing af því er að það fækkar sífellt í þessum hópi fólks vegna álags – félagið holast innan frá!  Gefið ykkur augnablik, lokið augunum og ímyndið ykkur Húsavík án íþróttafélagsins Völsungs !

Til þess að við sjáum Völsung ná tíræðisaldri með þeirri reisn sem félagið á skilið þá þarf hugarfarsbreytingu hjá okkur öllum!  Spyrjum okkur “Hvað get ég gert fyrir Völsung?” í stað þess að spyrja “Hvað getur Völsungur gert fyrir mig?”.  Það eru ótal verk, lítill og stór sem vinna þarf í félaginu og fólk á öllum aldri getur tekið þátt.  Það er gefandi að vinna sjálfboðastarf í þágu samfélagsins okkar.  Við hvetjum því einstaklinga, vinahópa, saumaklúbba, karlaklúbba og alla hina til að leggja félaginu lið með því að taka að sér afmörkuð verkefni fyrir félagið. 

Við skorum á ykkur að eiga þetta samtal við vin eða vinkonu og kanna hvort að hann eða hún hafi kannski innst inni áhuga á að láta gott af sér leiða í skemmtilegu félagsstarfi.

Síðastliðin sjö ár hafa verið tíð skipti framkvæmdastjóra hjá félaginu og á því eru margar skýringar. Þessar mannabreytingar hafa verið tímafrekar og hafa mörg mikilvæg og góð verkefni setið á hakanum vegna þessa. Nú er staðan sú að stór hluti aðalstjórnar mun ekki gefa kost á sér til áframhaldandi stjórnarsetu. Að sinna svo stóru og öflugu félagi tekur mikinn tíma og við teljum okkur hafa sinnt því af mikilli alúð en að okkar mati er kominn tími á breytingar. Því munum við auglýsa eftir fólki í aðalstjórn félagsins fyrir aðalfund félagsins sem haldinn verður í byrjun maí.

Vonumst eftir góðum viðbrögðum og nýju og öflugu fólki til að leiða okkar farsæla félag.

Áfram Völsungur!

Aðalstjórn Völsungs