Völsungar höfðu betur í baráttuleik gegn BF

Sigurinn í höfn.

Það var hart barist í íþrótta-höllinni í gærkveldi þegar Völsungur fékk Blakfélag Fjallabyggðar í heimsókn.

Um var að ræða leik um Íslandsmeistaratitilinn í 1. deild kvenna og höfðu Völsungar betur í miklum baráttuleik.

Heimastúlkur byrjuðu vel og unnu fyrstu hrinu en gestirnir komu hins vegar ákveðnari til leiks í annarri og þriðju hrinu og leiddu leikinn, 1-2. Í fjórðu hrinu fundu Völsungar aftur rétta taktinn og sigruðu og staðan því orðin 2-2.

Oddahrinan var æsispennandi framan af en svo sigu Völsungar fram úr og unnu hrinuna eftir fallegt og kraftmikið spil.

Völsungur vann því fyrsta leikinn en það lið sem vinnur fyrst tvo leiki spilar í Mizunodeildinni næsta tímabil.

Leikurinn var frábær skemmtun og mikil barátta í báðum liðum. Tæplega hundrað áhorfendur létu vel í sér heyra og þakkar Völsungur enn og aftur fyrir stuðninginn við liðið. 

Næsti leikur liðanna verður á Siglufirði á fimmtudaginn næstkomandi, Uppstigningardag, kl. 15:00.

 Með því að smella á myndirnar er hægt að fletta þeim og skoða í hærri upplausn.

 By clicking on the images you can view them in higher resolution