Viljayfirlýsing um björgunarmiðstöð á Þórshöfn undirrituð

Undirrituð hefur verið viljayfirlýsing á milli sveitarfélagsins Langanesbyggðar, Slökkviliðs Langanesbyggðar, Neyðarlínunnar ohf, Björgunarsveitarinnar Hafliða á Þórshöfn og Heilbrigðisstofnunar Norðurlands um að koma á laggirnar björgunarmiðstöð á Þórshöfn. 

Miðstöðin hýsi tæki, búnað og bifreiðar slökkviðliðsins, björgunarsveitarinnar og sjúkrabifreiðar auk aðstöðu fyrir starfsmenn og önnur rými sem tilheyra.

Í tilkynningu á vef Langanesbyggðar segir að megin markmiðið sé að ná fram hámarks samhæfingu og samvinnu auk hagræðingar í starfsemi þeirra en ekki síst að auka öryggi íbúa á norðaustur horni landsins. Að mati þeirra sem standa að viljayfirlýsingunni hefur þessi landshluti verið afskiptur þegar kemur að uppbyggingu hvers konar þjónustu við íbúa á þessum stóra og víðfeðma hluta landsins.

Björgunarmiðstöðin er stór þáttur í þeirri uppbyggingu þar sem það eru fáir sem sinna margvíslegum hlutverkum og samhæfing og samvinna þeirra því afar mikilvæg gagnvart öryggi íbúa.

Myndaður verður undirbúningshópur sem lætur gera þarfagreiningu þar sem fram koma upplýsingar um stærð þess rýmis sem talin er þörf á ásamt kostnaði og frumteikningum.

Viljayfirlýsingin

Undirritun viljayfirlýsingar um Björgunarmiðstöðvar. Fv. Þórarinn J. Þórisson slökkvistjóri, Jónas Egilsson sveitarstjóri og Þorsteinn Ægir Egilsson formaður Björgunarsveitarinnar Hafliða á Þórshöfn