Vígsla og opnun á Reykjaheiðarveginum

Freyja og Helena Eydís klippa á borðann.

Átthagafélag Torgara bauð öllum íbúum Torgsins til formlegra vígslu og opnunar á Reykjaheiðarveginum sl. fimmtudag.

Átthagafélag Torgara og sveitarfélagið Norðurþing stóðu að þessari athöfn.

Klippt var á borðann af fulltrúa Torgara, Freyju Sigurpálsdóttur sem er elsti núlifandi íbúi Torgsins en hún er fædd 1928 og Helenu Ingólfsdóttur, formanns byggðarráðs Norðurþings. 

Freyja Sigurpáls og Helena Eydís klippa á borðann.

Að athöfninni lokinni var gengið fylgtu liði undir fánaborg og lúðrablæstri að Kvíabekk, þar sem ávörp voru flutt af Helenu og Þorkeli Björnssyni fulltrúa frumíbúa Torgsins. Fram kom í ávörpum mikil ánægja með þessa framkvæmd og var verktökum og undirverktökum þökkuð frábær störf, gatan er ein sú fegursta á Húsavík. Aðalverktaki framkvæmdanna voru Höfðavélar ehf. á Húsavík. 

Gengið var fylgtu liði undir fánaborg og lúðrablæstri að Kvíabekk.

Oggi flutti ekki bara ávarp heldur myndaði líka.

Halldór Valda og Garðar Jónasar hlýða á ávörpin.

Fram kom í máli Þorkels m.a. að búseta hefur verið við Reykjaheiðarveginn frá árinun 1955 og lengi hefur verið beðið eftir úrbótum á malarveginum enda nánast engin breyting orðið á veginum í um 65 ár. Þá nefndi hann að íbúar götunnar hafi uppstyttulaust reynt að fá bæjaryfirvöld til að gera einhverjar úrbætur en alltaf talað fyrir daufum eyrum. Þá sagði Þorkell m.a að þegar núverandi ríkisstjórn tók við völdum heyrðist að hinn ötuli ráðherra umhverfismála ætlaði að friða Reykjaheiðarveginn í þeim búningi sem hann var á þeim forsendum að um væri að ræða einstætt veraldarundur sem aldrei hafði tekið nokkrum breytingum. Sagt var að ráðherrann ætlaði lengra með málið og stefndi að því að setja Reykjaheiðarveginn á heimsminjaskrá UNESCO.

Torgarar voru búnir að missa von um að Reykjaheiðarvegurinn yrði annað en sú forarvilpa sem hann hafði verið frá upphafi. Baráttuþrek var þrotið enda flestir leiðandi menn fyrir vegabótum horfnir til annara heimkinna. Því rak íbúa Torgsins í rogastans þegar stórtækar gröfur Höfðavéla hófu uppgröft á veginum s.l. sumar.

Niðurstaðan er einhver fallegasta gata bæjarins, sem ber verktökum og  undirverktökum fagurt vitni um vönduð vinnubrögð.

Að leiðarlokum viljum við þakka Norðurþingi fyrir einstaka vel heppnaða framkvæmd sem er hrein bæjarprýði.

Með því að smella á myndirnar er hægt að fletta þeim og skoða í hærri upplausn.