Ungmennaþing SSNE var haldið í Reykjadal

Dagana 14. og 15. október 2024 var haldið ungmennaþing SSNE í Reykjadal, þar sem 32 ungmenni á aldrinum 13–18 ára komu saman. 

Frá þessu segir á heimasíðu Þingeyjarsveitar en ungmennin 32 eiga það sameiginlegt að vera fulltrúar í ungmennaráðum sveitarfélaga á Norðurlandi eystra. 

Með þeim í för voru níu starfsmenn ungmennaráða, ásamt verkefnastjórum SSNE. Markmið ungmennaþingsins er að valdefla ungt fólk, styrkja tengsl þeirra við hvert annað og efla samvinnu á milli sveitarfélaga.

Myrra Leifsdóttir, verkefnastjóri æskulýðs-, tómstunda- og menningarmála í Þingeyjarsveit, fylgdi fjórum ungmennum sem munu skipa nýtt ungmennaráð Þingeyjarsveitar frá og með nóvember 2024. Fulltrúarnir voru þau Lilja Rós Sæþórsdóttir, Amelía Ásdís Kozaczek, Kristján Brynjólfsson og Júlía Brá Stefánsdóttir. Ungmennin tóku þátt í verkefnum sem miða að því að undirbúa þau fyrir þetta mikilvæga hlutverk.

Vel var tekið á móti hópnum á Narfastöðum, þar sem starfsfólkið sá til þess að þau hefðu það gott og eldaði dýrindis máltíðir ofan í þau. Pastarétturinn var svo vinsæll að ungmennin báðu um uppskriftina.

Í gegnum viðburðinn tóku ungmennin þátt í fjölbreyttum vinnustofum. Lýðræðislestin kom frá Alþingi og hélt vinnustofu um mikilvægi lýðræðis og hvernig frumvarp fer í gegnum Alþingi. Bergið headspace fjallaði um andlega heilsu ungmenna og fulltrúar frá Samfés fjölluðu um samstarf félagsmiðstöða og ungmennahúsa á landsvísu.

Sigríður frá Mögnum hélt svo sjálfseflandi vinnustofu og fræðslu um teymisvinnu. Þau fengu einnig innsýn í hvernig hægt er að nýta lýðræðislega þátttöku til að hafa áhrif á eigin samfélag. Að kvöldi var haldin leiklistarkvöldvaka þar sem þátttakendur komu saman og eyddu kvöldinu í skapandi starfi, sem styrkti enn frekar samheldnina í hópnum.

Það sem stóð upp úr var samt þegar Unnsteinn á Narfastöðum kveikti varðeld og ungmennin fengu að kynnast, drekka kakó, grilla sykurpúða og spjalla saman frameftir kvöldi, sum skelltu sér í pottinn á meðan önnur skiptust á að velja lög til að blasta út í störnubjart kvöldið.

Markmiðið með ungmennaþinginu er að valdefla ungt fólk, stuðla að aukinni tengingu á milli ungmenna í landshlutanum og búa til vettvang þar sem þau geta myndað sterkt tengslanet og unnið saman að framtíðarverkefnum. Slík þátttaka eykur skilning ungmenna á stjórnsýslu og lýðræðislegri þátttöku, sem er grunnurinn að sterku samfélagi.

Ungmennaþing SSNE hefur verið haldið árlega síðan 2021. Fyrsta þingið var haldið í Mývatnssveit, næst á Dalvík árið 2022, og síðan á Raufarhöfn árið 2023. Þingeyjarsveit er eitt af sveitarfélögunum sem tekur reglulega þátt í þinginu, og gott samtal ríkir milli starfsmanna sveitarfélaganna sem taka þátt. Starfsmenn SSNE sjá um hagnýta skipulagningu þingisins, í samstarfi við starfsfólk sveitarfélaganna.

Ungmennaþing eru haldin árlega til að virkja ungmennaráð á Norðurlandi eystra, styðja þau í starfi sínu og skapa vettvang þar sem raddir ungmenna fá aukið vægi í samfélaginu. Markmiðið er einnig að safna reynslu og skoðunum ungmenna þvert á sveitarfélög, stuðla að því að þau kynnist hvert öðru, og að þátttaka í stjórnsýslu og verkefnum SSNE verði bæði áhugaverð og eftirsóknarverð. Þá er afar mikilvægt að fá skilaboð frá ungmennum inn á samráðsvettvang sóknaráætlunar, þar sem þeirra sjónarmið geta haft raunveruleg áhrif á framtíðarskipulag samfélagsins.

Ungmennaráðin gegna lykilhlutverki í þessu ferli, og samstarf þeirra á milli er grundvallaratriði í því að móta framtíðina á Norðurlandi eystra segir að lokum í fréttinni á heimasíðu Þingeyjarsveitar.