Um hundrað manns þreyttu Mývatnsmaraþonið í blíðskaparveðri

Komið í mark.

Rúmlega 100 manns þreyttu Mývatnsmaraþonið í blíðskaparveðri í gær en keppt var, í maraþoni, hálfmaraþoni, 10 km. og 3 km.

Hlaupið hófst og endaði í Jarðböðunum við Mývatn og hlaupið var eftir þjóðveginum í kringum Mývatn.

Stefán Gíslason kom fyrstur í mark í maraþoninu á tímanum 3:29:47 og fyrst kvenna var Sigríður Björg en hún hljóp maraþonið á 3:49:46.

Úrslit Mývatnsmaraþons má finna á hlaup.is

Mývatnsmaraþon er frábær upplifun þar sem náttúran spilar stórt hlutverk. Það reynir vel á þol og styrk hlaupara í Mývatnsmaraþoni þar sem enda-spretturinn getur tekið á. En þátttakendur maraþonsins gátu notið þess að slakað á, eftir átökin, í Jarðböðunum þar sem miði í böðin var innifalinn í þátttökugjaldinu. Auk þess fengu allir þátttakendur sem luku keppni þátttökupening, stuttermabol merktan hlaupinu og grillveislu.

Í lok verðlaunaafhendingar voru veitt sérstök útdráttarverðlaun frá ferðaþjónustuaðilum í Mývatnssveit. 

Í tilkynningu frá aðstandendum Mývatnsmaraþonsin segir að þeir vilji nota tækifærið og þakka öllum þeim sem komu að skipulagningu hlaupsins og styrktaraðilum. 

Stefnt er á að halda næsta Mývatnsmaraþon laugardaginn 6. júní 2015 en þá verður fagnað tuttugu ára afmæli Mývatnsmaraþons.

Hlauparar við rásmarkið. Ljósmyndirnar tók Halldóra Birgisdóttir.