Þingeyingur marsmánaðar - Halldóra Jónsdóttir

Halldóra Jónsdóttir.Lj. Fbs. Þingeyingafélagsins.

Þingeyingafélagið hefur valið Halldóru Jónsdóttur sem Þingeying marsmánaðar 2020.

"Ég er dóttir Jóns Reynis Sigurjónssonar og Ólafar Þ. Hallgrímsdóttur, sem eru bændur og reka ferðaþjónustu og ferðamannafjós í Vogum í Mývatnssveit.

Ég er í raun Þingeyingur í báðar ættir þar sem föðuramma mín var Þórhalla Jónsdóttir frá Kaldbak við Húsavík og föðurafi minn Sigurjón Reynir Kjartansson bílstjóri og bóndi frá Miðhvammi í Aðaldal. Móðurafi minn var Hallgrímur Þórhallsson bóndi í Mývatnssveit og móðuramma mín frá Akureyri flutti 24 ára gömul í sveitina.

Ég ólst upp í Vogum í Mývatnssveit, en flutti eftir grunnskóla til Akureyrar og lauk stúdentsprófi af myndlista og hönnunarbraut frá Verkmenntaskólanum á Akureyri. Ég fann fljótt að í listsköpun átti ég heima og árið 2006 flutti ég til London og hóf nám við gömlu skósmíðadeildina Cordwainers, sem þá hafði verið tengd inn í hinn virta London College of Fashion, University of the Arts London. 

Námið var krefjandi en skemmtilegt, við lærðum bæði að hanna og smíða skó frá grunni ásamt því að farið var vel inn í hvernig viðskipta og tísku heimurinn virkar.

Árið 2010, lauk ég BA prófi með 1. einkunn og mér stóð til boða ýmiss skemmtileg störf í London. En vegna heimþráar og eftir að hafa yfirkeyrt mig á síðustu metrunum í náminu ákvað ég að fara aftur heim í Mývatnssveit og hugsa minn gang fyrst. Það hjálpaði mikið og ég sá fljótlega hvert ég átti að stefna, ég var ekki tilbúin að búa lengur erlendis og stofnaði því mína eigin skó og fylgihlutalínu HALLDORA árið 2011.

Síðan 2011, hef ég komið fjölda skó og veskja vörulínum á markað, sem ég vinn ásamt mínu samstarfsfólki og vinum, en framleiðslan fer fram að hluta til á Íslandi, Ítalíu og í Kína. Ég sæki innblásturinn mikið í heimahagana, hraunið og náttúruna og við notum svo töluvert af íslensku hráefni; lambaleðri, hreindýraleðri, roði, hrosshári klippt af töglum, sem ég svo vinn, lita, vef eða hekla frá grunni. (Ég einhvernveginn efast um að það fyrirfinnist fleiri skóhönnuðir í heiminum sem vinni sumt af sínu hráefni svona frá grunni og byrji á því að þvo hrossaskítinn úr í stórum bala á fjóshólnum heima!)

Í dag er ég búsett í Reykjavík ásamt unnusta mínum Þorsteini Mikael Gunnlaugssyni frá Svarfaðardal. Ég vinn að og tek þátt í hönnunarsamstarfi og rekstri verslunarinnar Jöklu á Laugavegi 90, ásamt eigin netverslun www.halldora.com þar sem vörur mínar fást einnig. Ég hef sótt nokkrar stórar sýningar erlendis, en ég fann fljótt að það væri gáfulegra að flýta sér hægt í útrásinni. Við höfum þó selt vörur í verslun bæði í Bandaríkjunum og í Hollandi, en erum að undirbúa og vinna að samningum við nokkrar erlendar verslanir, ásamt þátttöku í stórri ítalskri sýningu næsta haust.

Ég er fegin að hafa gefið mér undirbúningstímann og þróað á nokkrum árum form mín á skóm, hælum ofl, en ég einbeiti mér einnig að því að skórnir séu þægilegir. Ég hanna og þróa mótin allflest frá grunni. Í dag á fjöldinn allur af íslenskum og erlendum konum skó eftir mig, þar á meðal forsetafrúin okkar Eliza, söngkonan Björk, söngkonan Jóhanna Guðrún, nokkrir Eurovisionfarar, þýska óperusöngkonan Diana Damrau og söngkonan Lady Gaga svo eitthvað sé nefnt.

Það er margt skemmtilegt í vinnslu fyrir næstu mánuði og næsta ár, en við ætluðum að sýna nýja línu á hönnunarmars, sem hefur nú verið felldur niður, svo ég stefni á að setja upp smá öðruvísi viðburð, “live” eða í beinni á Facebook síðunni minni www.facebook.com/halldora.iceland í sárabætur.um miðjan apríl.

Það hafa líka orðið tafir á öllu hjá okkur útaf veiru ástandinu, við gerum eitthvað mjög skemmtilegt og flott þegar við náum að sigra veiruna og fagna endalokum samkomubannsins" segir Halldóra á fésbókarssíðu Þingeyingafélagsins.