Þingeyingur júlímánaðar - Snæbjörn Ingi Ingólfsson

Ég er búinn að vera allt of lengi brottfluttur í raun og veru. Það má segja að ég hafi verið alfluttur 1995, en ég fór í VMA 1990 og kom alltaf heim á sumrin að vinna og hjálpa til á búinu. Árið 1995 var fyrsta sumarið sem ég kom ekki heim. Ég lærði húsasmíði í VMA og kláraði raungreina stúdent í kjölfarið. Þá vann ég í smíðavinnu á Akureyri og leiddist þaðan í tölvubransann. 1998 fluttir ég svo til Reykjavíkur og fór að læra tölvunarfræði við HÍ. Hef búið síðan þá í Reykjavík. Sem eru nú orðin 22 ár. (allt of langt).

Ég er búinn að vinna í tölvubransanum í 25 ár. Í dag vinn ég sem viðskiptastjóri hjá Origo, er búinn að vera þar í 16 ár og hef gengt hinum ýmsu störfum. Í starfi viðskiptastjóra sinni ég sölu, ráðgjöf og samskiptum til nokkurra af helstu viðskiptavinum Origo. Þetta er virkilega krefjandi og skemmtilegt starf í lifandi og skemmtilegu fagi. Þar sem alltaf er að koma eitthvað nýtt á markaðinn. Ég hef einnig verið að sinna einhverju kynningastarfi fyrir Origo þar sem ég hef verið segja frá því sem er heitast á markaðnum hverju sinni.
Ekki nóg með að ég sé Þingeyingur, heldur náði ég mér í konu sem er hálfur Þingeyingur líka. Hún heitir Ragnheiður Valdimarsdóttir frá Dalvík. Pabbi hennar er Sigurður Valdimar Bragason frá Landamótsseli í Kinn og mamma hennar er Rósa Þorgilsdóttir frá Dalvík. Saman eigum við 3 börn, 25 ára dóttur og tvo syni, 16 og 12 ára. Að auki er dóttirin að gera okkur afa og ömmu síðar á árinu.

Það er alltaf endurnærandi að komast norður í Fjalladrottninguna. Reyni að fara reglulega, helst í sauðburð, smalamennsku og einhvern veiðiskap sérstaklega á haustin". Segir Snæbjörn Ingi Ingólfsson Þingeyingur júlímánaðar.