Svona má búa til milljarða fyrir Norðurþing

Jóhannes Þór Skúlason.

Árið 2018 komu um 317 þúsund ferðamenn til Húsavíkur. Það eru einungis um 13,8% allra ferða-manna sem sóttu Ísland heim það ár, en þessir 317 þúsund ferðamenn lögðu samt sem áður grunn að líflegri hvalaskoðunar-útgerð nokkurra fyrirtækja, safnarekstri, fleiri veitingahúsum en annars væri mögulegt og voru ásamt gestum fyrri ára og þeirra næstu grundvöllur uppbyggingar Fosshótelsins og Sjóbaðanna.

Og er þá aðeins tæpt á því helsta sem Húsavík hefur að bjóða ferðamönnum og ekki einu sinni horft til Norðurþings í heild sem geymir sumar fegurstu náttúruperlur og ferðamannastaði landsins. 

Sú frábæra uppbygging sem orðið hefur í ferðaþjónustu á Húsavík undanfarin ár hefur ekki síður skilað sér til íbúa Norðurþings, bæði í auknum lífsgæðum og tekjum sveitarfélagsins. Það er áhugavert að horfa á nokkrar staðreyndir í þessu sambandi, með það í huga hvað sveitarfélög og ríkisvaldið ættu að setja á oddinn þegar unnið er að starfsumhverfi ferðaþjónustufyrirtækja, skattaumhverfi þeirra, skipulagsmálum og öðru sem haft getur jákvæð eða neikvæð áhrif á reksturinn. 

Hvað geta heimamenn gert? 

Í fyrsta lagi má spyrja hversu sterkara Norðurþing gæti orðið ef til Húsavíkur kæmu tvöfalt fleiri ferðamenn á ári – um 600 þúsund? Það liggur í augum uppi hversu miklu máli það myndi skipta fyrir rekstur fyrirtækjanna, fyrir möguleika á stofnun nýrra fyrirtækja í ferðaþjónustu, fjölbreyttari atvinnumöguleika, auknar tekjur sveitarfélagsins og þar með möguleika á aukinni þjónustu og meiri lífsgæði fólks á svæðinu. En geta heimamenn haft áhrif á að fjölga ferðamönnum á svæðinu? 

Vissulega. Aðbúnaður fyrirtækja og stefna sveitarfélags gagnvart þeim getur haft mikil áhrif á það hvort að aðstæður skapast fyrir uppbyggingu tækifæra sem draga ferðamenn inn á svæðið. Auðvitað skiptir markaðssetning miklu máli, en góð markaðssetning byggir á því að aðdráttarafl og framboð á ferðaþjónustuvörum sé til staðar. Uppbygging Sjóbaðanna er m.a. frábært dæmi um ferðaþjónustuvöru sem hjálpar til við að breyta viðkomustað í áfangastað - ýtir undir að ferðamenn komi á svæðið og hafi áhuga á að stoppa þar lengur en annars. 

Hvaða máli skiptir ein gistinótt? 

Í því samhengi má líta á aðra tölulega staðreynd. Aðeins 39% ferðamanna sem komu til Húsavíkur í fyrra gistu þar, og um 40% þeirra stoppuðu innan við 6 klukkustundir. Uppbygging fjölbreyttari ferðaþjónustukosta á borð við Sjóböðin gerir það líklegra að ferðamaðurinn ákveði að stoppa lengur og gista jafnvel eina nótt. Og ávinningurinn af því er meiri en fólk gerir sér stundum grein fyrir. Ferðamaður sem gistir eina nótt er líklegur til að kaupa sér aðeins meiri þjónustu, kaupa eitt form af afþreyingu í viðbót, kaupa sér nesti í búðinni eða bakaríinu, bregða sér á safn eða annað sem hann gerir ekki ef hann stoppar innan við 6 klukkutíma. Þessi útgjöld eru ekki mikil fyrir hvern ferðamann, en þau eru ákaflega mikilvæg fyrir samfélagið og sveitarfélagið. 

Ef aðeins 10% fleiri af þeim ferðamönnum sem komu til Húsavíkur í fyrra, 31.700 manns í viðbót, hefðu gist eina nótt í bænum fyrir að meðaltali 20.000 krónur, keypt sér miða í Sjóböðin fyrir 4.300 krónur, eina máltíð á veitingahúsi fyrir um 5.000 krónur og morgunkaffi í bakaríinu fyrir 1.000 krónur hefði það skilað um einum milljarði króna inn í hagkerfið í Norðurþingi. 

Höfum hagsmuni ferðaþjónustunnar í huga! 

Einn milljarður króna einungis út á að 49% ferðamanna gistu eina nótt á Húsavík en ekki 39%, og bættu þess vegna við einni upplifun og eðlilegum matarútgjöldum. Og eins og við vitum skilar hluti milljarðsins sér ætíð til sveitarfélagsins. 

Það er þess vegna eftir miklu að slægjast fyrir sveitarfélög eins og Norðurþing, rétt eins og ríkið, að vinna með fyrirtækjum og auðvelda uppbyggingu þeirra, að hafa hagsmuni ferðaþjónustu í huga við ákvarðanir um skipulagsmál, að horfa til langtíma uppbyggingar fyrirtækja með lækkun fasteignaskatta og annarra álaga, og að setja skýra og skynsamlega stefnu varðandi styrkingu ferðaþjónustu sem gagnast getur öllu samfélaginu í Norðurþingi til framtíðar. 

Jóhannes Þór Skúlason

framkvæmdastjóri Samtaka ferðaþjónustunnar