Sladjana Smiljanic hættir hjá Völsungi

Sladjana Smiljanic .

Sladjana Smiljanic yfirþjálfari og leikmaður kvennaliðs Völsungs í blaki mun láta af störfum eftir að hafa þjálfað liðið sl. tvö tímabil.

Í fréttatilkynningu frá Blakdeild Völsungs. segir að eftir þriggja ára einstaklega farsælt og árangursríkt samstarf hafi Blakdeild Völsungs og Sladjana Smiljanic yfirþjálfari og leikmaður meistaraflokks kvenna ákveðið í sameiningu og mikilli sátt að nú sé komið að því að taka ný skref til framtíðar hjá báðum aðilum. 

"Sladjana kom til liðs við okkur Völsunga haustið 2016 sem leikmaður meistaraflokks og þjálfari yngri flokka og öldungahópa karla og kvenna. Hún tók við þjálfun meistaraflokks kvenna haustið 2017 og hefur leikið með og stýrt liðinu við frábæran orðstír síðustu 2 árin og unnið af miklum krafti og metnaði  með okkur að þeim markmiðum okkar Húsvíkinga að koma Völsungi aftur á stall meðal bestu blakliða Íslands í meistaraflokki kvenna og yngri flokkum beggja kynja. 

Völsungar allir  þakka Sladjönu frábært samstarf og óska henni og fjölskyldu hennar alls hins besta í framtíðinni" segir í tilkynningunni.

Ennfremur segir að Blakdeild Völsungs hafi hafið leit að nýjum þjálfara og stefnt sé að því að vinna áfram af miklum krafti í afreks og uppbyggingar-starfi deildarinnar sem hefur verið ævintýri líkast þessi 3 ár sem liðin eru frá því að blakdeildin ákvað að taka skrefin til fulls og tefla fram liði í efstu deild kvenna.

Og leggja um leið aukna áherslu á barna og unglingastarfið sem hefur auk öflugs meistaraflokksliðs skilað félaginu bæði Íslandsmeistaratitlum í yngri flokkum og unglingalandsliðsfólki á síðustu árum.” 

Sladjana Smiljanic og Lúðvík Kristinsson með Íslands- og bikarmeistaraliði Völsungs í 4 flokki stúlkna.