Skoska fyrirtækið Skyrora verðlaunað á Húsavík fyrir þróun umhverfisvænna eldflaugaeldsneytis

27. ágú

Skoska fyrirtækið Skyrora verðlaunað á Húsavík fyrir þróun umhverfisvænna eldflaugaeldsneytis
Fréttatilkynning - - Lestrar 134

Könnunarsafnið á Húsavík hefur verðlaunað skoska fyrirtækið Skyrora fyrir þróun á umhverfisvænu eldsneyti fyrir eldflaugar.

Þetta er er í sjötta sinn sem safnið á Húsavík veitir verðlaun sín, kennd við landkönnuðinn Leif Eiríksson. Skyrora skaut fyrr í mánuðinum á loft tilraunaeldflaug frá Sauðanesi á Langanesi og stefnir að frekari verkefnum hér á landi.

Eldsneytið sem Skyrora er að þróa nefnist Ecosene er framleitt úr úrgangsplasti, en auk minni umhverfisáhrifa þá hentar það einnig betur til eldflaugaskota á kaldari stöðum, líkt og Skotlandi og Íslandi. Eldsneytið fór í prófanir í byrjun þessa árs í Skotlandi.

"Ecosene er með um 45 prósent minna umhverisfótspor en hefðbundið eldflaugaeldsneyti og þolir jafnframt lengri bið og nýtist því betur til geimskota þar sem veðuraðstæður eru breytilegri og á köldum svæðum eins og hér á Íslandi," segir Örlygur Hnefill Örlygsson, safnstjóri Könnunarsafnins.

"Við eldflaugaskotið á dögunum benti Volodymyr Levykin stofnandi Skyrora mér á stafla af heyrúllum og sagði að plastið af þeim mætti nýta til að knýja lítið far út í geim, hráefni sem í dag fer í rusl," segir Örlygur. "Ef Ísland ætlar sér að sækja á þennan markað þá viljum við gera það með umhverfissjónarmið að leiðarljósi."

Eldflaugaskot Skyrora hér á landi var unnið í samvinnu við Geimvísinda- og tækniskrifstofuna og er áætlað að fleiri skot verði hér á næstu árum.

Könnunarsafnið verðlaunaði við sama tækifæri grísk-kanadíska landkönnuðinn George Kourounis, auk Jeff Blumenfeld og Dr. Ulyana Horodyskyj fyrir störf að landkönnun.

Aðsend ljósmynd