Sjö leikmenn skrifuðu undir samninga við Völsung í dag.

"Það voru ungu herramennirnir Arnþór Máni Böðvarsson, Einar Örn Sigurðsson, Guðmundur Gígjar Sigurbjörnsson, Jakob Héðinn Róbertsson, Kristján Leó Arnbjörnsson, Ólafur Jóhann Steingrímsson og Tryggvi Grani Jóhannsson.

 

Jakob Héðinn og Tryggvi Grani eru báðir að skrifa undir sína fyrstu samninga. Jakob er á 16. ári og þar með enn gjaldgengur í 3. flokk en Tryggvi er á 17. ári og nýgenginn upp úr þeim flokki í meistaraflokk.

 

Arnþór Máni, Einar Örn og Guðmundur Gígjar framlengdu allir samninga sína en þeir hafa verið viðloðandi meistaraflokkinn síðustu tvö árin og eru enn á 2. flokks aldri. Arnþór á að baki einn meistaraflokksleik, Einar tvo en Guðmundur á enn eftir að taka þátt í sínum fyrsta mótsleik.

 

Kristján Leó er á tvítugsaldri og nýgenginn upp úr 2. flokki. Hann á að baki fjóra leiki fyrir meistaraflokk Völsungs.

 

Ólafur Jóhann er aldursforseti undirskriftarinnar, 21 árs gamall og á 62 leiki fyrir Völsung þar sem hann hefur skorað 4 mörk. Hlutverk Ólafs í liðinu hefur farið stigvaxandi undanfarin ár og hann er kominn með mikla reynslu sem vonandi mun nýtast okkur innan sem utan vallar í sumar".

 

 

Tryggvi Grani, Guðmundur Gígjar og Jakob Héðinn.

 

 

Arnþór Máni, ólafur Jóhann, Einar Örn og Kristján Leó.