Samstarfsyfirlýsing um uppbyggingu íbúðarhúsnæðis í Skútustaðahreppi

Helgi Héðinsson og Guðmundur Þór Birgisson

Helgi Héðinsson sveitarstjóri Skútustaðahrepps og Guðmundur Þór Birgisson framkvæmdastjóri Jarðbaðanna undirrituðu í vikunni samstarfsyfirlýsingu um uppbyggingu íbúðar-húsnæðis í sveitarfélaginu þar sem Jarðböðin hf. og Skútustaðahreppur lýsa yfir vilja til samstarfs.

Frá þessu segir á heimasíðu Skútustaðahrepps.

Jarðböðin kynntu nýverið metnaðarfull uppbyggingaráform. Áformin munu skapa fjölda nýrra starfa og í því ljósi er það vilji Jarðbaðanna að tryggja starfsfólki sínu húsnæði.

Að sama skapi er það vilji sveitarfélagsins að styðja við öflugt atvinnulíf og mannlíf á svæðinu og fjölga íbúum til að styrkja stoðir samfélagsins. Í því ljósi er íbúðarhúsnæði lykil atriði.

Samstarfið við Jarðböðin er mikilvægur hlekkur í stærra verkefni þar sem leitast verður við að byggja til að mæta þörfum íbúa, eldra fólks og fyrirtækja á svæðinu ásamt uppbyggingu leiguhúsnæðis í samstarfi við Húsnæðis- og mannvirkjastofnun. Útfærsla verkefnisins og samstarf verður mótað nánar á komandi vikum.