Samið um rekstur Áfangastaðastofu

Í dag var undirritaður samningur Markaðsstofu Norðurlands og landshlutasamtakanna SSNV og SSNE um rekstur Áfangastaða-stofu. 

Í tilkynningu segir að þar með ljúki ferli sem hefur staðið yfir formlega allt frá árinu 2017 þegar hafinn var undirbúningur að gerð fyrstu áfangastaðaáætlana svæðanna. Þó má segja að ferli hafi í raun hafist árið 2015 þegar Markaðsstofur landshlutanna settu fram stefnu um að fá skýrari tengingu við stjórnvöld ferðamála, skilgreind hlutverk og öfluga fjármögnun til lengri tíma.

Áfangastaðastofur eru samstarfsvettvangur sveitarfélaga, ríkis og atvinnugreinarinnar og er markmiðið með stofnun þeirra að efla stoðkerfi ferðaþjónustunnar og stuðla að jákvæðum framgangi hennar. Meðal hlutverka eru gerð áfangastaðáætlana, að koma að gerð stefnumótunar í ferðaþjónustu, þarfagreining rannsókna, vöruþróun og nýsköpun, mat á fræðsluþörf auk þess að sinna svæðisbundinni markaðssetningu og vera grunneining í stoðkerfi ferðamála í landshlutunum.

Markaðsstofa Norðurlands hefur verið með samning við Ferðamálastofu um stoðkerfi ferðaþjónustu á starfssvæði sínu en nú hefur sá samningur verið færður yfir í samning Atvinnuvega- og nýsköpunarráðuneytis, Ferðamálastofu og Landshlutasamtakanna. Samstarf við Íslandsstofu verður einnig eflt í þessu samhengi og gerður sérstakur samningur um markaðssetningarverkefni.

Það er mikið fagnaðarefni að samstaða hefur verið á Norðurlandi um að halda áfram úti markvissu starfi fyrir landshlutann í heild sinni undir merkjum Norðurlands eða North Iceland eins og verið hefur frá árinu 2003 þegar Markaðsstofan var stofnuð. Stefna MN verður óbreytt, að aukning verði á vægi ferðaþjónustu allt árið sem tryggi uppbyggingu innviða, greiðar samgöngur, fleiri heilsársstörf og meiri framlegð í greininni. Ein af grundvallarforsendum þess er að beint áætlunarflug hefjist til Norðurlands.

Segja má að verkefnin skiptist í tvær deildir við þessa samninga, annars vegar innviðaþróun og hins vegar markaðssetningu. Ekki er þó um grundvallarbreytingu á verkefnum Markaðsstofunnar að ræða. MN mun áfram vinna þétt með fyrirtækjunum og sveitarfélögunum á svæðinu að framgangi ferðaþjónustunnar og hvetur alla til að vera í sambandi við okkur varðandi öll verkefni eða ef spurningar vakna um þessa nýju samninga um Áfangastaðastofu.

Hér má má skoða nýjustu Áfangastaðaáætlun Norðurlands

Á meðfylgjandi mynd eru Unnur Valborg Hilmarsdóttir, framkvæmdastjóri SSNV, Arnheiður Jóhannsdóttir, framkvæmdastjóri MN og Eyþór Björnsson, framkvæmdastjóri SSNE.