Samfélagsleg áhrif af beinu millilandaflugi á Norðurlandi

Þetta kemur fram á heimasíðu SSNE en erlendar rannsóknir hafa sýnt að gott aðgengi að ódýrum og þægilegum flugsamgöngum hefur jákvæð áhrif á framleiðni, viðskipti, tekjur, neyslu og einkafjárfestingu á áhrifasvæði viðkomandi flugvalla.

Betri flugsamgöngur auka jafnframt lífsgæði íbúanna með margvíslegum hætti, svo sem með betra aðgengi að sérhæfðari þjónustu, fleiri möguleikum á orlofs- og skemmtiferðum og auknum samskiptum við fjarlæga vini og fjölskyldu og stuðla að fólksfjölgun á viðkomandi svæðum.

Um þriðjungur Akureyringa ferðaðist milli landa með Niceair á tíu mánaða tímabili 2022–23 og flugið jók einnig lífsgæði þeirra sem ekki nýttu sér það. Annars staðar á Norðurlandi eystra stuðlaði flug Niceair einnig að auknum utanlandsferðum og hafði nokkur áhrif á lífsgæði en áhrifin voru lítil á Norðurlandi vestra og Austurlandi.

Flug Niceair til Kaupmannahafnar og Tenerife sýndi að heimamarkaðurinn á Norðurlandi eystra getur staðið undir reglubundnu millilandaflugi allan ársins hring en ferðir erlendra ferðamanna eru nauðsynlegar til að tryggja ásættanlega sætanýtingu á öllum leggjum. Þessar niðurstöður geta nýst til frekari uppbyggingar millilandaflugs um Akureyrarflugvöll.

Nánar má lesa um rannsóknina hér