RARIK lagði 155 km af ljósleiðurum með jarðstrengjum 2020

Lagning jarðstrengs á Tjörnesi. Lj. RARIK

RARIK endurnýjar að jafnaði um 200 km af dreifikerfi fyrir-tækisins á hverju ári og fækkar þannig loftlínum jafnt og þétt fyrir jarðstrengi sem leysa þær að hólmi.

Þetta kemur fram í frétt á heimasíðu RARIK en á síðasta ári var fjármagn til strengvæðingar aukið enn frekar og yfir 300 km af jarðstrengjum lagðir þannig að nú eru um 67% af dreifikerfi RARIK komin í jörðu.

Þetta hefur m.a. leitt til þess að truflunum vegna veðurs hefur fækkað til mikilla muna. Önnur jákvæð áhrif sem færri vita um, er að töluvert hefur verið plægt af ljósleiðurum niður með jarðstrengjunum.

Sveitarfélög og fjarskiptafyrirtæki hafa nýtt sér samlegðaráhrifin sem felast í að hægt er að plægja samtímis bæði jarðstrengi og ljósleiðara. Þannig voru á síðasta ári plægðir samtals um 155 km af ljósleiðurum á veitusvæði RARIK.