Ólafur Jóhann tryggði Völsungi sigur í uppbótartíma

Ólafur Jóhann skorar sigurmarkið.

Völsungur hafði sigur í Norðurlandsslagnum í 2. deild karla þegar Tindstóll kom í heimsókn í gærkveldi.

Það stefndi allt í markalaust jafntefli í miklum baráttuleik þar sem Aron Dagur Birnuson markmaður Völsungs varði oft á tíðum meistaralega.

Í uppbótartíma, á 91. mínútu, skoraði Ólafur Jóhann Bergmann Steingrímsson sigurmark leiksins með glæsilegu skoti rétt innan vítateigslínu gestanna. 

Tindastóll hafði fengið aukaspyrnu á vallarhelmingi Völsunga og upp úr henni náði Ólafur Jóhann boltanum á miðju vallarins. Hann geystist upp völlinn í skyndisókn og hamraði boltann í netið með vinstri. Hans fyrsta deildarmark fyrir Völsung og örugglega ekki það síðasta. Ólafur Jóhann er fimmti Steingrímssonurinn sem skorar fyrir meistaraflokk Völsungs í Íslandsmóti.

Með sigrinum komst Völsungur í 2. sætið í deildinni en er með leik meira en næstu lið.

Hér má sjá stöðuna

Hér koma nokkrar myndir úr leiknum og með því að smella á þær er hægt að fletta þeim og skoða í stærri upplausn.

Halldór Mar Einarsson kom inn á fyrir Eyþór Traustason snemma leiks og hér geysist hann upp kantinn með Stefan Antonio Lamanna á hælunum.

Freyþór Hrafn Harðarson í baráttu við Santiago Fernandez markvörð Stólanna.

Ólafur Jóhann skorar hér sitt fyrsta deildarmark fyrir Völsung en hann hafði komið inn á fyrir Elvar Baldvinsson á 75. mínútu leiksins.

Ólafur Jóhann fagnar hér marki sínu.

Völsungar fögnuðu markinu vel og lengi.

Aron Dagur markvörður Völsungs varði oft á tíðum meistaralega í leiknum. Hér er hann í leik gegn Fram í bikarnum.