Ný slökkvibifreið til Norðurþings

Norðurþings fékk á dögunum afhentan nýjan slökkvibíl frá fyrirtækinu Ólafur Gíslason & Co. hf.

Það var Dagný Guðmundsdóttir framkvæmdastjóri sem afhenti Katrínu Sigurjónsdóttur sveitarstjóra bílinn og við sama tækifæri veitti Grímur Kárason, slökkviliðsstjóri Norðurþings, lyklunum að bílnum viðtöku f.h. slökkviliðs Norðurþings.

Frá þessu segir á heimasíðu Norðurþing.

Bifreiðin var keypt fullbúin frá Póllandi eftir sameiginlegt útboð sveitarfélaga á slökkvibílum árið 2022. Hún er af gerðinni Scania 500hp með 4.000 ltr dælu og One-Seven 5500 kerfi sem sjöfaldar slökkvimátt þess vatns sem notað er um leið og mengun við slökkvistörf minnkar. Á bílnum eru tveir öflugir fjarstýrðir mónitorar, annar á þaki og hinn á framstuðara. Margvíslegur annar búnaður er í bílnum og munu slökkviliðsmenn Norðurþings fá þjálfun og kennslu á bifreiðina frá framleiðanda. Í kjölfarið verður hún tekin í fulla notkun.

Slökkviliðið festi einnig kaup á körfubíl í lok febrúar af gerðinni Mercedes Benz Aktros. Bíllinn er ætlaður til lífbjörgunar og slökkviliðsstarfa af hærri byggingum en tólf stór fjölbýlishús auk hærri bygginga fyrirtækja og opinberra stofnana eru á Húsavík.

Laugardaginn 6. júlí verður opið hús hjá slökkviliðinu frá kl. 13.00 – 16.00. Þar mun slökkviliðið sýna bíla, búnað og aðstöðu liðsins á Norðurgarði. Íbúar Norðurþings og aðrir gestir eru hvattir til að mæta.